ძიუდოს ფედერაციის პრეზიდენტის, დავით ქევხიშვილის განმარტებით, მან დღემდე ვერ მოისმინა არგუმენტი რატომ უნდა გადადგეს. მისივე თქმით, ულტიმატუმების გზით პროცესის წაყვანა არ შეიძლება და პასუხისმგებლობა ყველამ უნდა აიღოს.

"იკითხეთ სამინისტროში, იკითხეთ სპორტის კომიტეტში, ჰკითხეთ ყრილობის ნებისმიერ დელეგატს, თუ მათ მოისმინეს რამე არგუმენტი, მზად ვარ ვაგო პასუხი, მაგრამ არა ასე, უბრალოდ", - ამბობს ქევხიშვილი.

ყრილობამ დღეს ძიუდოს ფედერაციის პრეზიდენტის ოთხწლიანი ანგარიში განიხილა. როგორც ქევხიშვილი ამბობს, მიმდინარე პროცესებზე მან ყველა დოკუმენტაცია წარადგინა, მათ შორის, იმაზე, რომ სპორტსმენები შეჯიბრებებზე თავისი ფულით არ დადიან.

დავით ქევხიშვილის მოუწოდებს ძიუდოისტებს, რომ მოლაპარაკებების მაგიდას მიუსხდნენ და თავიანთი არგუმენტები ისე წარმოადგინონ.

ძიუდოისტებმა, რომლებიც პრეზიდენტის გადადგომას ითხოვენ, დღევანდელი რიგგარეშე ყრილობა პროტესტის ნიშნად დატოვეს. როგორც მათ განმარტეს, მათ კითხვებზე პასუხი ვერ მიიღეს.

ნაკრების კაპიტანი ვარლამ ლიპარტელიანი ამბობს, რომ ყრილობაზე დასწრების უფლებას სპორტსმენებს არ აძლევდნენ და მხოლოდ თხოვნის შემდეგ გახდა ეს შესაძლებელი. მისივე თქმით, პასუხების მისაღებად მათ ყრილობის დასრულებას უნდა დაელოდონ.

ძიუდოისტების პროტესტი

ძიუდოს ნაკრების რამდენიმე წევრი გუნდის კაპიტან ვარლამ ლიპარტელიანთან ერთად ფედერაციის პრეზიდენტის, დავით ქევხიშვილის გადადგომას ითხოვს. ძიუდოისტები ქევხიშვილის გადადგომის მოთხოვნის მიზეზს, ერთი მხრივ, ნაკრების წარუმატებლობასა და მეორე მხრივ, ფედერაციაში არსებულ მძიმე და უსიამოვნო სიტუაციას უკავშირებენ.

სპორტსმენები აცხადებენ, რომ თუ დავით ქევხიშვილი არ გადადგება, ისინი საერთაშორისო ტურნირებში მონაწილეობას აღარ მიიღებენ. როგორც ქევხიშვილის ამბობს, ის გადადგომას არ აპირებს.

აპრილის ბოლოს ევროპის ჩემპიონატიდან უმედლოდ დაბრუნების შემდეგ ძიუდოს ნაკრების მთავარმა მწვრთნელმა, ირაკლი ცირეკიძემ გუნდი დატოვა, გადადგა მთელი სამწვრთნელო შტაბი.

კულტურისა და სპორტის მინისტრმა, მიხეილ გიორგაძემ თქვა, რომ ფედერაციაში არსებული პრობლემის შესასწავლად სამინისტროს, პარლამენტის სპორტის კომიტეტისა და ოლიმპიური კომიტეტის ერთობლივი კომისია შეიქმნა. მისივე განმარტებით, კომისიამ უკვე გამოითხოვა ფედერაციიდან ინფორმაცია და მისი შესწავლის შემდეგ შედეგები გასაჯაროვდება.