საპარლამენტო უმრავლესობის წევრი და ადამიანის უფლებათა დაცვის კომიტეტის წევრი, დიმიტრი ცქიტიშვილი მიიჩნევს, რომ დაუშვებელია ახალგაზრდული და კლუბური ცხოვრების დემონიზების მცდელობა. დეპუტატის თქმით, ამ სოციალურ გარემოში საზოგადოების გათანამედროვება, გაევროპულება ხდება. ამის შესახებ ცქიტიშვილმა საზოგადოებრივი მაუწყებლის ეთერში ისაუბრა.

დეპუტატი ამბობს, რომ მიუხედავად იმისა, რომ შესაძლოა, ტრაგიკული შემთხვევები იყო კლუბებშიც არ უნდა განიხილებოდეს ეს დაწესებულებები პრობლემის მიზეზად.

"ცალსახად ეს საკითხები უნდა გავმიჯნოთ და მათ ძალიან ჯანსაღად, ობიექტურად უნდა შევხედოთ. კლუბის მეპატრონეები ძალიან ცდილობენ, ქვეყნის გათანამედროვებას და პროგრესს შეუწყონ ხელი და მათი დადანაშაულება ასეთ საკითხებში არ შეიძლება არანაირად ისევე, როგორც არ შეიძლება სახელმწიფოს დადანაშაულება ამ კონკრეტულ, რამდენიმე დღის წინ მომხდარ კონკრეტულ ფაქტში, რადგან ეს არის გარემოებები, რომლებიც ცალკეულ შემთხვევებში ყოველთვის მოხდება. სამწუხაროდ, მაგრამ რეალურად ადამიანი, რომელიც მოიხმარს ნარკოტიკს ამ რისკის ზონაში შედის", - განაცხადა ცქიტიშვილმა.

მისი თქმით, ტრაგიკული შემთხვევებს თავიდან ვერ აირიდებდნენ, რადგან ყველა ახალი ნარკოტიკი ახალი საფრთხე, ახალი რისკია.

"ხშირ შემთხვევაში შესაძლოა, სახელმწიფო უძლური აღმოჩნდეს, მაგრამ მაქსიმალურად უნდა მოვახდინოთ პრევენცია, რომ რაც შეიძლება, ნაკლები ნარკოდამოკიდებული იყოს და გვქონდეს მექანიზმი, ასეთ შემთხვევაში ნარკოდამოკიდებული როგორ გამოვიყვანოთ იმ მდგომარეობიდან, რაშიც შესაძლოა, ის აღმოჩნდეს", - განაცხადა დიმიტრი ცქიტიშვილმა.

ოფიციალური ინფორმაციით, ბოლო ერთ კვირაში უცნობი ნარკოტიკული საშუალების ზედოზირებით ოთხი ადამიანი გარდაიცვალა, ათამდე კი ინტოქსიკაციის ნიშნებით სამედიცინო დაწესებულებაში გადაიყვანეს.

საზოგადოების ერთი ჯგუფი ამ შემთხვევებს ე.წ. კლუბურ ნარკოტიკს უკავშირებს და ღამის კლუბებისა და ბარების დახურვას ითხოვს. თუმცა საგამოძიებო უწყებებს ჯერ არცერთ შემთხვევაზე უთქვამთ, რომ გარდაცვალების მიზეზი "კლუბური ნარკოტიკი" იყო.