თბილისის მერიას უკვე შეუძლია ტაქსის ლიცენზირებისა და ტრანზიტული მოძრაობის წესები შემოიღოს. ამის უფლება მას საქართველოს კანონმდებლობაში შეტანილი ცვლილებებით აქვს. კანონი პარლამენტმა დღეს მიიღო.

ცვლილებების მიხედვით, მერია თბილისის საკრებულოს დასამტკიცებლად წარუდგენს დედაქალაქში ტაქსით გადაყვანის სანებართვო პირობებს, ნებართვის გაცემისა და გადახდის წესს, ვადას და გაცემის ფასს.

გარდა ამისა, თბილისის მთავრობამ უნდა დაადგინოს და საკრებულოს დასამტკიცებლად წარუდგინოს შემდეგი დოკუმენტები:

  • ქუჩების ჩამონათვალი, სადაც ავტობუსები გაჩერდებიან მხოლოდ გაჩერებებზე;
  • სატვირთო ავტომობილის და სატრანსპორტო საშუალებით ეკონომიკური საქმიანობის განმახორციელებელი პირისათვის სამეწარმეო საქმიანობისთვის საქონლის მიწოდებისთვის განსაზღვრული ადგილისა და დროის შესახებ წესი;
  • თბილისის მთავრობა გასცემს საქართველოს დედაქალაქში მსუბუქი ავტომობილით-ტაქსით გადაყვანის ნებართვას ან ნებართვის გაცემაზე უფლებამოსილებას ანიჭებს თბილისის მერიის სტრუქტურულ ერთეულს.

ორგანულ კანონში ცვლილებებით ავტომატურად შეიცვალა სხვა რამდენიმე კანონის მუხლებიც.

ცვლილება საქართველოს ადმინისტრაციულ სამართალდარღვევათა კოდექსში

საკანონმდებლო ცვლილების შემდეგ დედაქალაქის თვითმმართველობა ვალდებული ხდება სადისტრიბუციო მანქანებს დაუდგინოს მოძრაობის ადგილი და დრო.

მათი მოძრაობის სავარაუდო დროდ დედაქალაქის თვითმმართველობის მიერ განისაზღვრება საათები.

შეზღუდვა შეეხებად სატვირთო ავტომობილებს, რომლებიც ქალაქში გადაადგილდებიან. სატვირთო ავტომობილების მოძრაობის აკრძალვის სავარაუდო დროდ დედაქალაქის თვითმმართველობის მიერ განისაზღვრება 2-2 საათი დილა-საღამოს, პიკის საათებში.

კანონში აღნიშნული ჩანაწერით დედაქალაქის ქუჩებში ეტაპობრივად დარეგულირდება
ავტობუსების მოძრაობა და განისაზღვრება კონკრეტული ლოკაციები, სადაც მგზავრთა
ჩასხდომა-გადმოსხდომისას უსაფრთხოება უზრუნველყოფილი იქნება.

წარმოდგენილი პროექტით კანონმდებლობა გამკაცრდება სხვა სახის სატრანსპორტო საშუალებების მძღოლებისთვისაც, რომლებიც ჩერდებიან ან დგანან ავტობუსების გაჩერებების ადგილებზე.

კანონის მიხედვით, ახალი რეგულაციების დამრღვევი სატვირთო ავტომობილის მძღოლები დაჯარიმდებიან. კერძოდ, თბილისში ტრანზიტული მოძრაობის წესის დარღვევაზე ჯარიმა იზრდება 20 ლარიდან 500 ლარამდე.

კოდექსს ემატება მუხლები, რომლებიც ითვალისწინებენ:

  • 100 ლარიან ჯარიმას სატვირთო და სადისტრიბუციო მანქანების მიერ მოძრაობის
    წესის დარღვევაზე;
  • 100 ლარიან ჯარიმას ავტობუსებისა და მიკროავტობუსების მიერ დედაქალაქის
    თვითმმართველობის მიერ განსაზღვრულ ქუჩებზე დადგენილი გაჩერების წესის
    დარღვევაზე;
  • 50 ლარიან ჯარიმას დედაქალაქის თვითმმართველობის მიერ განსაზღვრულ ქუჩებზე
    სხვა სახის სატრანსპორტო საშუალებების ავტობუსის გაჩერებებზე გაჩერების ან
    დგომის წესის დარღვევისას;
  • 200 ლარიან ჯარიმას მსუბუქი ავტომობილით-ტაქსით გადაყვანის განხორციელებაზე
    უნებართვოთ ან სანებართვო პირობების დარღვევით.

ცვლილება ლიცენზირებისა და ნებართვების შესახებ საქართველოს კანონში

ამ დრომდე არსებული კანონი ლიცენზირებისა და ნებართვების გაცემის წესებს საქალაქთაშორისო ტრანსპორტთან დაკავშირებით ადგენდა, თუმცა არ ითვალისწინებდა რეგულაციებს ქალაქში, ტაქსების მოძრაობის შესახებ.

პირველ ჯერზე, ტაქსებზე რეგულაციები მხოლოდ თბილისში განხორციელდება. ნებართვების ჩამონათვალს ემატება საქართველოს დედაქალაქში მსუბუქი ავტომობილით-ტაქსით მგზავრთა გადაყვანის ნებართვა და შესაბამისი მუხლებით განისაზღვრება აღნიშნული ნებართვის გაცემის წესი.

ამ ნებართვის გაცემისას მოსაკრებლის გადახდა საჭირო არ იქნება.

ტაქსით გადაყვანის სანებართვო პირობებს, ნებართვის გაცემის ფასსა და მისი გადახდის წესს დაამტკიცებს დედაქალაქის საკრებულო.

ეს კანონი ითვალისწინებს ცვლილებას საავტომობილო ტრანსპორტის შესახებ საქართველოს კანონში, რომელსაც დაემატება ტერმინების: მსუბუქი საავტომობილო-ტაქსისა და ტრანზიტული მოძრაობის განმარტებები. დადგინდება თბილისის მერიისა და საკრებულოს უფლებამოსილებები. შესაბამისი ცვლილება შევიდა საგზაო მოძრაობის შესახებ საქართველოს კანონშიც.