25 საარჩევნო უბნის მონაცემებით, პარლამენტის შუალედურ არჩევნებში ქართული ოცნების კანდიდატი, გივი ჭიჭინაძე ლიდერობს. საბოლოო შედეგამდე კიდევ 35 უბნის მონაცემებია საჭირო. გამარჯვებისთვის კანდიდატმა ხმების 50 პროცენტზე მეტი უნდა დააგროვოს. წინააღმდეგ შემთხვევაში მეორე ტური დაინიშნება.

პარლამენტის შუალედური არჩევნები #54 ოლქში ტარდება, რომელიც ვანისა და ხონის მუნიციპალიტეტებს აერთიანებს. ცესკოს ინფორმაციით, საარჩევნო უბნებზე ამომრჩეველთა აქტივობამ 57,9 პროცენტი შეადგინა. სულ 48 123 ათასი ამომრჩეველი იყო რეგისტრირებული, მათგან 27 846 მოქალაქე არჩევნებზე უკვე მივიდა.

მაჟორიტარობისთვის იბრძოდა ექვსი კანდიდატი:

  • გიორგი უგულავა - ბაქრაძე, უგულავა - ევროპული საქართველო;
  • გიორგი ლილუაშვილი - საქართველო;
  • ზურაბ ქართველიშვილი - ტრადიციონალისტები;
  • გივი ჭიჭინაძე - ქართული ოცნება - დემოკრატიული საქართველო;
  • მამუკა ტუსკაძე - ახალი ქრისტიან-დემოკრატები;
  • ვასილ კოპალიანი - საინიციატივო ჯგუფი - სოფიო მეშველიანი, შორენა ჯურხაძე, ვაჟა კოპალიანი, თამარ კუხალაშვილი, მარინა ჩაგუნავა.

შუალედური არჩევნების ჩატარება მას შემდეგ გახდა საჭირო, რაც ქართული ოცნების დეპუტატმა, გრიგოლ ლილუაშვილმა სახელმწიფო უსაფრთხოების სამსახურში ვახტანგ გომელაურის მოადგილის პოსტზე გადაინაცვლა. ის ხონისა და ვანის მაჟორიტარი 2016 წლის საპარლამენტო არჩევნების შედეგად გახდა.