სომხეთის ახლადარჩეული პრემიერის, სერჟ სარგსიანის გადადგომა არ აღმოჩნდა საკმარისი იმისთვის, რომ ქვეყანაში პროტესტი შეწყვეტილიყო. ერევნის ცენტრში აქციები ისევ დაანონსდა. ოპოზიციონერი ლიდერმა, ნიკოლ პაშინიანმა დღეს, 25 აპრილს, მოქალაქეებს მიმართა და საღამოს შეკრებისკენ მოუწოდა.

ახლა რესპუბლიკის მოედანზე ხალხი კვლავ იკრიბება. ადგილზე მობილიზებულია პოლიციური შენაერთები და სპეცტექნიკა. მთელი ერევნის ტერიტორიაზე შეზღუდულია მობილური კავშირგაბმულობა. მომიტინგეებმა გადაკეტეს აეროპორტისკენ მიმავალი გზა.

გავრცელებული ინფორმაციით, დედაქალაქის გარდა, საპროტესტო აქციები მიმდინარეობს სომხეთის რეგიონებშიც და მომიტინგეებმა გადაკეტეს ვანაძორი-ბაგრატაშენის დამაკავშირებელი გზატკეცილი, რომელიც სომხეთს საქართველოსთან აკავშირებს.

სომხური მედიის ცნობით, ერევანში პოლიციასა და მომიტინგეებს შორის ფიზიკური დაპირისპირების რამდენიმე ინციდენტი მოხდა. საპროტესტო მოძრაობას შეურთდა სომხეთის სპორტის და ახალგაზრდობის ახალგადამდგარი მინისტრი, გრაჩი ბაგრამიანიც.

დღესვე გაიმართა შეხვედრა, ნიკოლ პაშინიანისა და პრემიერ-მინისტრის მოვალეობის შემსრულებელ კარენ კარაპეტიანს შორის. შეხვედრა სულ რამდენიმე წუთის განმავლობაში გაგრძელდა, მხარეები ვერ შეთანხმდნენ.

პაშინიანი ითხოვდა მონაწილეების შემადგენლობის შემცირებასა და შეხვედრის მედიისთვის გახსნას. მოთხოვნების დაკმაყოფილებაზე კარაპატიანმა უარი თქვა. ოპოზიციას ამ დროისთვის ორი მთავარი მოთხოვნა აქვს, დროებით პრემიერ-მინისტრად ნიკოლ პაშინიანი დაინიშნოს და ჩატარდეს თავისუფალი ვადამდელი საპარლამენტო არჩევნები.

სავარაუდოდ, საპროტესტო აქციები სომხეთში კიდევ რამდენიმე დღის განმავლობაში გაგრძელდება. პაშინიანმა პრესკონფერენციაზე აღნიშნა, რომ საპროტესტო ტალღა იმ დრომდე არ შეწყდება, სანამ ხალხის ყველა მოთხოვნა არ შესრულდება.

"რესპუბლიკურ პარტიას არანაირი ძალაუფლება აღარ აქვს, არსებობს ამ ძალაუფლების მხოლოდ აჩრდილი. მე არ მჭირდება გარანტიები მათგან, მე მხოლოდ ხალხის მხარდაჭერა მჭირდება. მე ვერ ვხედავ ქვეყანაში ვერანაირ ძალას, რომელიც წინ აღუდგება ხალხის ნებას. რესპუბლიკის მოედანი და იქ შეკრებილი ხალხი არის რეალური ძალაუფლება ამაზე ვერავინ იკამათებს", - განაცხადა პაშინიანმა დღეს გამართულ პრესკონფერენციაზე.

მისი თქმით, ოპოზიცია არ დაუშვებს სარგსიანის ნაცვლად რესპუბლიკური პარტიის რომელიმე სხვა წარმომადგენლის პრემიერ-მინისტრად დანიშნავს. მისივე განცხადები, დროებითი პრემიერად ხალხის მიერ არჩეული კანდიდატი უნდა დაინიშნოს და თუ კი ხალხი მის კანდიდატურას მხარს დაუჭერს, ის მზადაა პასუხისმგებლობა აიღოს.

რამდენიმედღიანი აქციების შემდეგ, 23 აპრილს სომხეთის პრემიერი, სერსჟ სარქისიანი გადადგა.