სომხეთის სპორტის მინისტრის მოვალეობის შემსრულებელი, გრაჩია როსტომიანი თანამდებობიდან გადადგა და ქუჩის საპროტესტო აქციებს შეუერთდა. ამის შესახებ ინფორმაციას რადიო თავისუფლების ადგილობრივი ბიურო ავრცელებს.

"დარწმუნებით მინდა ვუთხრა სპორტსმენებსა და მსოფლიო სპორტის წარმომადგენლებს, რომ დრო მოვიდა, სომხეთის დროშა რესპუბლიკის მოედანზე ხალხის თავზე ფრიალებდეს. ჩემს კოლეგებს რესპუბლიკური პარტიიდან მოვუწოდებ, რომ შეუერთდეს ხალხს და მის მოთხოვნებს დაემორჩილოს. ამ ეტაპზე არაფერია იმაზე მნიშვნელოვანი, რომ ჩვენი სამშობლოსთვის მშვიდობიანი გამოსავალი ვიპოვოთ" , - ნათქვამია როსტომიანის განცხადებაში.

დღეს, 25 აპრილს დილიდან ერევანში საპროტესტო აქციები განახლდა. დაუმორჩილებლობის აქციის განახლება მას შემდეგ გადაწყდა, რაც გაირკვა, რომ სომხეთის პარლამენტის ოპოზიციონერი დეპუტატის, ნიკოლ პაშინიანის და პრემიერ-მინისტრის მოვალეობის შემსრულებლის, კარენ კარაპეტიანის შეხვედრა აღარ გაიმართება.

ნიკოლ პაშინიანმა ფეისბუქზე მხარდამჭერებს მიმართა და სამომავლო გეგმებიც გააჟღერა. მისი თქმით, პრემიერ-მინისტრად ხალხის კანდიდატი, "ხავერდოვანი რევოლუციის" კანდიდატი უნდა დაინიშნოს, ამის შემდეგ უნდა შეიქმნას დროებითი მთავრობა, რომელსაც რესპუბლიკელების გარეშე ვადამდელი საპარლამენტო არჩევნები მოჰყვება და პრემიერ-მინისტრს ხალხი აირჩევს.

მასობრივი პროტესტიდან მე-11 დღეს სერჟ სარგსიანმა სომხეთის პრემიერ-მინისტრის პოსტი დატოვა. ამ გადაწყვეტილებით სარგსიანმა ერევანში 13 აპრილს დაწყებული საპროტესტო აქციების მთავარი მოთხოვნა შეასრულა