სომხეთის ოპოზიციის ლიდერმა, ნიკოლ პაშინიანმა მოსახლეობას მოუწოდა დღეიდან, რესპუბლიკის მოედანზე აქციები განაახლონ. ამის შესახებ ნიკოლ პაშინიანმა ფეისბუქმიმართვაში განაცხადა.

ოპოზიციის ლიდერის თქმით, აშკარაა, რომ რესპუბლიკური პარტია და პრემიერ-მინისტრის მოვალეობის შემსრულებელი კარენ კარაპეტიანი ფიქრობენ, რომ სომხეთის მოქალაქეები და სომეხი ხალხი სერ სარგსიანის გადადგომით სრულად დაკმაყოფილდა და ახლა რესპუბლიკური პარტიის განახლების დროა.

პაშინიანის თქმით, მოვლენების ამგვარი განვითარება, რევოლუციის ინტერესებში არ შედის.

ოპოზიციის ლიდერი კარენ კარაპეტიანის განცხადებას გამოეხმაურა, სადაც პრემიერ-მინისტრმა სომხეთის პრეზიდენტს საპარლამენტო და არასაპარლამენტო პოლიტიკური ძალებთან გაფართოებული შეხვედრის გამართვისკენ მოუწოდა, რათა იმსჯელონ არსებულ შიდა პოლიტიკური მდგომარეობაზე და პრობლემის გადაჭრის გზად ვადამდელი საპარლამენტო არჩევნები განიხილონ.

"მინდა ხაზგასმით აღვნიშნო, რომ მათ უნდათ არჩევნები, მაშინ როცა პრემიერ-მინისტრის პარტია რესპუბლიკური პარტიაა. ჩვენ ვიცით, რომ ეს იქნება 2017 წლის არჩევნების მსგავსი, რაც ცალსახად მიუღებელია. ჩვენ შეგვიძლია არჩევნებს ბოიკოტი გამოვუცხადოთ და არ წავიდეთ არჩევნებზე, თუმცა მოვახდინოთ საარჩევნო უბნების ბლოკირება და ხელი შევუშალოთ რესპუბლიკური პარტიის განახლების გეგმას", - განაცხადა პაშინიანმა.

მისი თქმით, პრემიერ-მინისტრად ხალხის კანდიდატი, ხავერდოვანი რევოლუციის კანდიდატი უნდა დაინიშნოს, ამის შემდეგ უნდა შეიქმნას დროებითი მთავრობა, რომელსაც რესპუბლიკელების გარეშე ვადამდელი საპარლამენტო არჩევნები მოჰყვება და პრემიერ-მინისტრს ხალხი აირჩევს.

"ჩვენ მოვახერხეთ და სერჟ სარგსიანი გადავაყენეთ. ჩვენ შევძლებთ, კარენ კარაპეტიანისა და რესპუბლიკური პარტიის მოშორებას. ბატონო კაპარეტიანო, მე მინდა გითხრათ, რომ ჩვენ არ მოგცემთ ნებას ასეთი ქმედებები განახორციელოთ და რაც უფრო მალე შეიგნებთ ამას, ყველა ჩვენგანისთვის უკეთესი იქნება", - განაცხადა პაშინიანმა.

მასობრივი პროტესტიდან მე-11 დღეს სერჟ სარგსიანმა სომხეთის პრემიერ-მინისტრის პოსტი დატოვა. ამ გადაწყვეტილებით სარგსიანმა ერევანში 13 აპრილს დაწყებული საპროტესტო აქციების მთავარი მოთხოვნა შეასრულა.