საქართველოს საგარეო საქმეთა მინისტრის, მიხეილ ჯანელიძის განცხადებით, საქართველო ნატოსთან დაახლოებით უსაფრთხოებას აძლიერებს და უახლოვდება საბოლოო მიზანს - ნატოსა და ევროკავშირში ინტეგრაციას. ამის შესახებ საქართველოს საგარეო საქმეთა მინისტრმა ნატოს კვირეულის ფარგლებში ბათუმში ვიზიტისას განაცხადა.

"ნატოსთან ჩვენი ურთიერთობები არასდროს ყოფილა ისეთი ძლიერი, როგორიც არის დღეს. ეს შედეგი მიღწეულია ბოლო წლების განმავლობაში", - განაცხადა მინისტრმა.

მისი თქმით, საქართველოს ევროატლანტიკური ინტეგრაციის პროცესი არ არის მხოლოდ საგარეო პოლიტიკის შემადგენელი ნაწილი და საქართველოს დემოკრატიულ განვითარებას უკავშირდება.

"როდესაც ჩამოდიხარ ბათუმში, ხვდები, რომ ეს ქვეყანა ნამდვილად ძალიან სწრაფად და სწორი მიმართულებით ვითარდება და ჩვენს ქვეყანას ნამდვილად ძალიან კარგი მომავალი აქვს. დღეს ჩვენ აჭარაში ვხედავთ სწორი განვითარების პოლიტიკას, რომელიც უზრუნველყოფს თითოეული მოქალაქის კეთილდღეობას. ამ მიზანს ემსახურება ჩვენი საგარეო და საშინაო პოლიტიკა", - განაცხადა მიხეილ ჯანელიძემ.

ის ამბობს, რომ ევროატლანტიკური ინტეგრაციის პროცესი საქართველოს არა მხოლოდ საგარეო, არამედ შიდა პოლიტიკას განსაზღვრავს.

"ამ პროცესს უკავშირდება ძალიან ბევრი რეფორმა და ღონისძიება და ეს ღონისძიებები გარდაქმნის ჩვენს ქვეყანას ძლიერ, დემოკრატიულ, განვითარებულ სახელმწიფოდ", - აღნიშნა მიხეილ ჯანელიძემ.

მინისტრის თქმით, საქართველოს მთავრობა მოსახლეობის დაკვეთით მოქმედებს.

"ჩვენი მოსახლეობის არჩევანია დასავლური, ევროპული, ევროატლანტიკური ინტეგრაცია და ჩვენ ყველა ვემსახურებით ამ დაკვეთას” - განაცხადა მინისტრმა.