შეწყალების კომისიის თავმჯდომარის, ზვიად ქორიძის განცხადებით, შეწყალების კომისიის წევრთა შემადგენლობა უნდა გაფართოვდეს.

საქართველოს პრეზიდენტის ადმინისტრაციის განცხადებით, პრეზიდენტის სასახლეში შეწყალების კომისიის წევრების, პრეზიდენტის მრჩევლებისა და ძალადობის საკითხებზე მომუშავე არასამთავრობო ორგანიზაციების შეხვედრა 17 აპრილს გაიმართა.

"უნდა მოხდეს კომისიის წევრთა შემადგენლობის გაფართოება და იმ ადამიანების მოწვევაც კომისიაში, რომლებიც შეიძლება, კიდევ უფრო მეტად წაადგნენ ამ სტანდარტის აწევას", - განაცხადა ქორიძემ.

პრეზიდენტის საპარლამენტო მდივნის, ანა ნაცვლიშვილის განცხადებით, საჭიროა "პროფესიონალი ადამიანებისა და კომპეტენტური წრეების დახმარება":

"ეს პროცესი დავიწყეთ იმისთვის, რომ შინაარსი და გადაწყვეტილების მიღების სტანდარტი გაცილებით უფრო მაღალი გახდეს. არასამთავრობოებმა გამოთქვეს მზადყოფნა, რომ ამ პროცესში მიიღონ მონაწილეობა".

შეხვედრის მონაწილეები შეწყალების მექანიზმის გენდერული მიმართულებით სტანდარტის გაზრდასა და კომისიის შემადგენლობის გაფართოებაზე შეთანხმდნენ.

16 აპრილს პრეზიდენტმა, გიორგი მარგველაშვილმა განაცხადა, რომ შეწყალების კომისია ძალადობრივი დანაშაულის საქმეებზე შეწყალების აქტების გამოცემას დროებით წყვეტს.

მისივე განმარტებით, შეწყალება შეწყდება მანამ, სანამ კონსულტაციებს არ გაივლიან შეწყალების პროცესის "ყველა აქტორთან" როგორც სახელმწიფო უწყებებთან, ისე ძალადობაზე მომუშავე ჯგუფებთან.