რუსეთი აფრთხილებს ნატოს, რომ შავ ზღვაში ალიანსის სამხედრო აქტივობამ შესაძლოა ნეგატიური შედეგი გამოიღოს. ამის შესახებ რუსეთის მუდმივმა წარმომადგენელმა, ალექსანდრ გრუშკომ ნატო-რუსეთის საბჭოს სხდომაზე განაცხადა, რომელიც 13 ივლისს ბრიუსელში გაიმართა. ინფორმაციას რია ნოვოსტი ავრცელებს.

"ჩვენ განვიხილეთ ეს საკითხი, განვიხილეთ შავი ზღვა. განვაცხადეთ, რომ შავი ზღვის რეგიონში ნატოს ნებისმიერი ქვეყნის მიერ სამხედრო მოქმედებების გაზრდა სიტუაციის დესტაბილიზაციას გამოიწვევს და ხელყოფს რეგიონის უსაფრთხოებას," - განაცხადა გრუშკომ.

მოსკოვში აცხადებენ, რომ შავი ზღვის რეგიონში ალიანსის მიერ სამხედრო წარმომადგენლობის გაზრდის საპასუხოდ რუსეთიც გაზრდის თავის საზღვაო დაჯგუფებას აღნიშნულ რეგიონში იმისთვის, რომ ბალანსი შენარჩუნდეს.

1936 წლის მონტრეს კონვენციის თანახმად, შავი ზღვის აკვატორიაში იმ სამხედრო ხომალდებს გაჩერება, რომლებიც აღნიშნულ წყლებს არ ეკუთვნის, მხოლოდ 21 დღის განმავლობაში შეუძლიათ.

აქიდან გამომდინარე, ნატოს წევრი ქვეყნებიდან შავ ზღვაში მუდმივად გაჩერება მხოლოდ რუმინეთს, თურქეთსა და ბულგარეთს შეუძლიათ. ამასთან, სოფიამ შავი ზღვის რეგიონში ალიანსის წარმომადგენლობის გაზრდასთან დაკავშირებულ ინიციატივაზე უარი განაცხადა, რადგან რეგიონში ომი არ სურს.