"შეწყალების პროცესის მიმართ მიზანმიმართული შეტევა მიმდინარეობს", - ასე შეაფასა შეწყალების კომისიის თავმჯდომარე ზვიად ქორიძემ ბრალდებები იმის შესახებ, რომ პრეზიდენტმა ნარკორეალიზაციაში ბრალდებული ირაკლი ქორიძე ნათესაობის გამო შეიწყალა.

ზვიად ქორიძის თქმით, პრეზიდენტმა შეწყალების გადაწყვეტილება საპარლამენტო კომიტეტის დასკვნასა და ასევე შეწყალების კომისიის დადებითი რეკომენდაციის საფუძველზე მიიღო. მისივე თქმით, შეწყალების კომისიას არ ჰქონდა ინფორმაცია პრეზიდენტთან ირაკლი ქორიძის შესაძლო ნათესაური კავშირის შესახებ .

როგორც შეწყალების კომისიის თავმჯდომარე განმარტავს, 2014 წლის იანვარში შეწყალებული ირაკლი ქორიძე ნარკორეალიზაციაზე არ იყო გასამართლებული.

ზვიად ქორიძის თქმით, ირაკლი ქორიძის საქმის ირგვლივ ატეხილი ხმაური პოლიტიკური ჯგუფების მიერ აგორებული შავი პიარია პრეზიდენტის და შეწყალების კომისიის წინააღმდეგ.

ირაკლი ქორიძეს, გიორგი გიორგანაშვილთან და კიდევ ორ პირთან ერთად, საქართველოში სუბოტექსის შემცველი 900 აბის შემოტანაზე წაუყენეს ბრალი. აღნიშნულთან დაკავშირებით, საპარლამენტო უმრავლესობის და ოპოზიციის წევრებმა განაცხადეს, რომ ირაკლი ქორიძე პრეზიდენტმა 2014 წელს ნათესაობის გამო შეიწყალა.