სახალხო დამცველი ეხმიანება ქალთა მოძრაობის განცხადებას, მის მიერ საზოგადოებრივი მაუწყებლის სამეურვეო საბჭოს წევრის კანდიდატად ზვიად დევდარიანის დასახელების შესახებ.

ომბუდსმენის განცხადებით, მიუხედავად იმისა, რომ ბრალდებები ამ ეტაპზე სამართლებრივად დადასტურებული არ არის, კანდიდატმა ზვიად დევდარიანმა მიზანშოწონილი განცხადება გაავრცელა საზოგადოებრივი მაუწყებლის სამეურვეო საბჭოს კონკურსიდან კანდიდატურის მოხსნაზე.

სახალხო დამცველის განმარტებით, მან გადაწყვეტილების მიღებისას, იხელმძღვანელა ისეთი კრიტერიუმებით, როგორიცაა კანდიდატის დამოუკიდებლობა, გამოცდილება, მოტივაცია და პროფესიული კვალიფიკაცია. სახალხო დამცველი აღნიშნავს, რომ მისთვის ცნობილი არ ყოფილა, შესაძლო სავარაუდო სექსუალური შევიწროების ფაქტების შესახებ და იგი კანდიდატის დასახელების შემდგომ გახდა ცნობილი.

სამოქალაქო საზოგადოების განვითარების სააგენტოს (სიდა) აღმასრულებელმა დირექტორმა, ზვიად დევდარიანმა საზოგადოებრივი მაუწყებლის სამეურვეო საბჭოს წევრობიდან საკუთარ კანდიდატურა ქალთა მოძრაობის განცხადების შემდეგ მოხსნა.

დევდარიანი ქალთა მოძრაობის ბრალდებას პასუხობს, სექსუალური შევიწროების შემთხვევებზე და ამბობს, რომ თუ ეს ბრალდებები გაცდება ზოგად განცხადებებს, ის მზადაა სამართლებრივი გზებით გააგრძელოს დავა.

ქალთა მოძრაობამ ომბუდსმენის მიერ წარდგენილი სამეურვეო საბჭოს კონკურსის ერთ-ერთი მონაწილე ზვიად დევდარიანი სექსუალურ შევიწროების 10-მდე შემთხვევაში დაადანაშაულა.

ქალთა მოძრაობა საქართველოს პარლამენტს და სახალხო დამცველს მიმართავს, რომ პარლამენტმა საზოგადოებრივი მაუწყებლის სამეურვეო საბჭოს წევრად არ აირჩიოს ომბუდსმენის მიერ წარდგენილი კანდიდატი, ზვიად დევდარიანი.