კვირას, 11 მარტს, iHeartRadio-ზე წლის საუკეთესო ქალი არტისტის ჯილდოს მიღების შემდეგ, ტეილორ სვიფტმა ახალი მუსიკალური ვიდეო გამოუშვა.

Delicate სვიფტის ბოლო ალბომის მე-6 სინგლია და უკვე მეოთხე კლიპია, რაც Reputation-ის ფარგლებში გამოვიდა.

კლიპი ჟოზეფ ხანის გადაღებულია, რომელიც უკვე წლებია, რაც სვიფტის კლიპების ავტორია.

ვიდეო კარგად ხსნის იმას, თუ რატომ გაუჩინარდა ტეილორი საჯარო ადგილებიდან 2016 წელს.

დასაწყისში სვიფტი პოპულარობის ზენიტშია. მას ჟურნალისტები, ფანები, აბეზარი თაყვანისმცემლები და დაცვა ყველგან დაჰყვება. ტეილორი თავს მარიონეტად გრძნობს და სარკეში საკუთარ თავს აჯავრებს, თუმცა ჯადოსნური წერილის მიღების შემდეგ, უჩინარი ხდება და სწორედ ამ დროს იწყება ნამდვილი თავგადასავალი - ის ცეკვავს ისე, თითქოს, არავინ უყურებს, სასტუმროს მისაღებებზე არბის და დერეფნებში ტრიალებს, შემდეგ ლოს-ანჯელესის მეტროში შერბის და საბოლოოდ წვიმაში ასრულებს ცეკვას - ამის შემდეგ ბედნიერი ტეილორი ბარში შედის, სადაც აღმოაჩენს, რომ მას ისევ ხედავენ.

სვიფტის ახალი ალბომის მსოფლიო ტურნე 8 მაისს, არიზონადან იწყება.