"დანაშაულის პრევენციის ცენტრი დამნაშავეა" - ამ სახელწოდების აქცია უწყებიდან გათავისუფლებულმა თანამშრომლებმა, ანა სუბელიანმა და თამაზ ახობაძემ გამართეს. ორივე მათგანი სააპელაციო სასამართლოს გადაწყვეტილების აღსრულებას - თანამდებობებზე აღდგენასა და განაცდური ანაზღაურების მიღებას ითხოვდა. აქცია ეროვნულ არქივთან გაიმართა, სადაც იუსტიციის სამინისტროს პრეზენტაცია მიმდინარეობდა.

ანა სუბელიანის განცხადებით, დღევანდელ შეხვედრაზე უწყება საკუთარ მიღწევებზე საუბრობს, ამიტომ სურდათ შეკრებილი საზოგადოებისთვის ბუკლეტები დაერიგებინათ და "მთავარ მიღწევაზე" - სასამართლოს გადაწყვეტილების არ აღსრულებაზე ინფორმაცია მიეწოდებინათ.

On.ge-ს დაუკავშირდა დანაშაულისა და პრევენციის ცენტრს, უწყებაში ამ საკითხზე არ საუბრობენ.

2014 წელს ანა სუბელიანი და თამაზ ახობაძე სამსახურიდან გაათავისუფლეს. ისინი გათავისუფლებას მინისტრის, თეა წულუკიანის პირად გადაწყვეტილებას უკავშირებდნენ, რადგან მათ ფეისბუკზე გააპროტესტეს დანაშაულის პრევენციის ცენტრის, დავით მაისურაძის, გათავისუფლება. სუბელიანმა და ახობაძემ სსიპ-ს, დანაშაულის პრევენციის ცენტრს, სააპელაციო სასამართლოში დავა 2017 წლის 9 მარტს მოუგეს.

დანაშაულის პრევენციის ცენტრმა აღნიშნული გადაწყვეტილება გაასაჩივრა უზენაეს სასამართლოში, თუმცა, უმაღლესმა ინსტანციამ 2017 წლის 18 სექტემბერს დაუშვებლად სცნო საკასაციო საჩივარი და ძალაში დატოვა სააპელაციო სასამართლოს გადაწყვეტილება.