შინაგან საქმეთა მინისტრის მოადგილემ, ნათია მეზვრიშვილმა რუსთავში, ე.წ სტამბოლის ბაზრობაზე მომხდარ მკვლელობასთან დაკავშირებით განცხადება გააკეთა. საკუთარ კაბინეტში მოკლულ ბაზრობის დირექტორს, ყოფილ დეპუტატ სამსონ ქუთათელაძეს ცეცხლსასროლი იარაღით 6 ჭრილობა აქვს მიყენებული.

უწყების ინფორმაციით მიმდინარეობს საგამოძიებო პროცესები და ამოღებულია ბაზრობის გარე პერიმეტრზე დამონტაჟებული კამერები. ბაზრობის შიდა ტერიტორიაზე და გარდაცვლილის სამუშაო ოთახში სათვალთვალო კამერები დამონტაჟებული არ იყო.

მეზვრიშვილის განცხადებით ჯერჯერობით მხოლოდ ეს დეტალებია ცნობილი, ჩანიშნულია ექსპერტიზები და დამატებითი ინფორმაცია საზოგადოებისთვის მოგვიანებით გახდება ცნობილი.

საქმეზე გამოძიება სისხლის სამართლის კოდექსის ორი მუხლით მიმდინარეობს. 108-ე მუხლით, რომელიც განზრახ მკვლელობას და 236-ე მუხლით, რომელიც ცეცხლსასროლი იარაღის მართლსაწინააღმდეგო შეძენა-შენახვას გულისხმობს.

სამსონ ქუთათელაძე 2004-2006 წლებში ეროვნული გვარდიის სარდალი, 2008–2012 წლებში კი საქართველოს VII მოწვევის პარლამენტის წევრი და თავდაცვის და უშიშროების კომიტეტის თავმჯდომარის მოადგილე იყო