ლოს-ანჯელესში, 20th Century Fox-ის სტუდიის მიმდებარე ქუჩებზე დღეს დილით მსახიობ მერილ სტრიპისა და პროდიუსერ ჰარვი ვაინშტაინის პოსტერები გამოჩნდა, რომელზეც სამი ოსკარის მფლობელ სტრიპს თვალებზე წარწერა აქვს - "მან იცოდა".

როგორც გაირკვა, პოსტერის ავტორები სტრიპს ადანაშაულებენ იმაში, რომ მან ვაინშტეინის მხრიდან ქალებზე ძალადობის ყველა ფაქტი იცოდა, მაგრამ ამაზე ხმამაღლა არასდროს ლაპარაკობდა.

პოსტერების გაკვრის ინსპირაცია, როუზ მაკგოვანისა და მერილ სტრიპის დაპირისპირება გახდა.

როუზ მაკგოვანის ბრალდებას, რომ მერილ სტრიპის მხრიდან ოქროს გლობუსზე გამოსვლა სიმბოლური შავი კაბით თვალთმაქცობა იყო, მსახიობმა ვრცელი წერილით უპასუხა.

სტრიპის თქმით, მაკგოვანი მასზე არასწორ ინფორმაციას ავრცელებს და სურს, რომ მას სიმართლე გააგებინოს.

როუზ მაკგოვანი ჰარვი ვაინშტაინის მიერ გაუპატიურებულ ქალებს შორისაა.

"მერილ სტრიპის მსგავსი მსახიობები, რომლებიც ბედნიერად მუშაობდნენ ღორ მონსტრთან [ჰარვი ვაინშტაინი] ოქროს გლობუსზე შავი კაბებით მიდიან და ეს მათი ჩუმი პროტესტია. არადა პრობლემა სწორედ თქვენი სიჩუმეა. თქვენ ყალბ ჯილდოებს მშვიდად იღებთ და სინამდვილეში ცვლილებები არ მოგაქვთ. მეზიზღება თქვენი თვალთმაქცობა. იქნებ საერთოდ მარჩესა [ვაინშტაინის ყოფილი ცოლის ტანისამოსის ბრენდი] ჩაგეცვათ?" - დაწერა როუზ მაკგოვანმა ტვიტერზე, თუმცა ეს პოსტი უკვე წაშლილია.

სტრიპმა მაკგოვანს ჰაფინგტონპოსტზე გამოქვეყნებული წერილიდან უპასუხა:

"მტკივნეულია მაკგოვანის მხრიდან ნიუსების სათაურებიდან თავდასხმები, მაგრამ მინდა მან იცოდეს, რომ ვაინშტაინის დანაშაულებრივ ქმედებებზე არაფერი ვიცოდი. არც 90-იან წლებში, როცა როუზი მისი მსხვერპლი გახდა და არც იმ ათწლეულების განმავლობაში, როცა ის [ვაინშტაინი] სხვებს ესხმოდა თავს. მე განზრახ კი არ ვიყავი ჩუმად, მე უბრალოდ არ ვიცოდი. მე ჩემი სიჩუმით არ ვიცავდი გაუპატიურებაში ბრალდებულებს. მე უბრალოდ არ ვიცოდი. მე არ მომწონს, როცა ახალგაზრდა ქალებს ესხმიან თავს, უბრალოდ არ ვიცოდი, რომ ეს ხდებოდა".

სტრიპმა დასძინა, რომ ის არასდროს ყოფილა ვაინშტაინის სახლში ან სასტუმრო ნომერში და ჰოლივუდიდან გაძევებული პროდიუსერიც არასდროს მიუღია შინ:

"ყველა მსახიობმა ქალმა და კაცმა, ან რეჟისორმა, რომლებიც ვაინშტაინის კომპანიის დახმარებით იღებდნენ ფილმებს, არ იცოდა, რომ ის ქალებს ავიწროებდა და აუპატიურებდა, სანამ ეს თავად ამ ქალებმა არ გვითხრეს".

მერილის წერილის შემგდეგ, მაკგოვანმა ბოდიში მოიხადა.

გამომდინარე იქიდან, რომ 2017 წელი ჰოლივუდისთვის საკმაოდ მძიმე იყო, ყველაზე განხილვადი თემები კი სექსიზმი, ბულინგი და სექსუალური შევიწროვება აღმოჩნდა, ამერიკული კინემატოგრაფის ყველაზე გავლენიანმა ქალმა მსახიობებმა გადაწყვიტეს ამ ყველაფრის მიმართ პროტესტის ნიშნად ცერემონიაზე შავი კაბები ჩაიცვან და ამ გზით კიდევ ერთხელ დააფიქსირონსაკუთარი პოზიცია.

ჰარვი ვაინშტაინი 90-ზე მეტმა ქალმა დაადანაშაულა სექსუალურ შევიწროებაში, თავდასხმასა და გაუპატიურებაში. მის საქმეს ლოს-ანჯელესის, ბევრლი ჰილზის, ნიუ-იორკისა და ლონდონის პოლიცია იძიებს.