პოლიტიკური პარტია - გირჩი მარიხუანის მოხმარებისთვის ადმინისტრაციული წესით პატიმრობისა და ჯარიმის გაუქმების მიზნით ადამიანს ეძებს, რომლის სახელითაც საქართველოს საკონსტიტუციო სასამართლოს მიმართავს. საკონსტიტუციო სარჩელით გირჩს ადმინისტრაციულ სამართალდარღვევათა კოდექსის 45-ე მუხლის გაუქმება, მარიხუანის მოხმარების ნაწილში, სურს.

კანონის ამ მუხლით, ნარკოტიკული საშუალების, მისი ანალოგის ან პრეკურსორის მცირე ოდენობით უკანონო დამზადება, შეძენა, შენახვა, გადაზიდვა, გადაგზავნა ან/და ექიმის დანიშნულების გარეშე მოხმარება ან ფინანსურ სანქციას ან ადმინისტრაციული წესით თავისუფლების აღკვეთას ითვალისწინებს.

"თქვენგან დაგვჭირდება მხოლოდ საქმის მასალები და მინდობილობა. სხვა ყველაფერს ჩვენ მივხედავთ", - ვკითხულობთ გირჩის ფეისბუკგვერდზე და მოქალაქეებს მიმართვისკენ მოუწოდებენ.

30 ნოემბერს საკონსტიტუციო სასამართლომ დააკმაყოფილა საკონსტიტუციო სარჩელი, რომელიც მარიხუანის მოხმარების დეკრიმინალიზებას ეხება. მაშინ საკონსტიტუციო სარჩელით მოქალაქე გივი შანიძემ პარტია გირჩის დახმარებით მიმართა.