საქართველოს კომუნიკაციების ეროვნულმა კომისიამ ინტერნეტ მომსახურების ხარისხთან და მის კონტროლთან დაკავშირებით დადგენილების პროექტი გამოაქვეყნა. კომისიის თქმით, 16 ნოემბერს კომისიაში ინტერნეტ მომსახურების ხარისხთან დაკავშირებით შეხვედრა გაიმართა, სადაც მომსახურების მიმწოდებლები გაეცნენ ინფორმაციას, თუ რა სახით გეგმავს კომისია აღნიშნული საკითხის ტექნიკურ და სამართლებრივ დარეგულირებას.

დადგენილების მიხედვით, რეგულირდება როგორც საცალო, ისე საბითუმო ინტერნეტ მომსახურების მიწოდების ვალდებულებები. ხელშეკრულებაში უნდა განისაზღვროს მიწოდებული მომსახურების მინიმალური, მაქსიმალური და ფაქტობრივად მიწოდებული სიჩქარე. ასევე, დადგინდება მიწოდებული სიჩქარის შემოწმებისა და გასაჩივრების პირობები.

საცალო ინტერნეტ მომსახურება

მიმწოდებელი უზრუნველყოფს მომხმარებლისათვის ხარისხიანი მომსახურების უწყვეტ და შეუფერხებელ მიწოდებას. ინტერნეტის ფაქტობრივი, ანუ ის სიჩქარე, რომელსაც მომხმარებელი დროის უმეტეს ნაწილში იღებს, მაქსიმალური სიჩქარის 80 პროცენტზე ნაკლები არ უნდა იყოს.

ამასთანავე, ფაქტობრივი სიჩქარე ხელმისაწვდომი უნდა იყოს სულ მცირე არაპიკის საათებში მუდმივად და პიკის საათების 90 პროცენტში ან მთელი დღის 95 პროცენტში. მომხმარებლისთვის მიწოდებული ფაქტობრივი სიჩქარე მინიმალურ სიჩქარეზე დაბალი ან ტოლი არ უნდა იყოს.

მიმწოდებელმა ტექნიკურად არ უნდა შეზღუდოს მიწოდებული მომსახურების სიჩქარე სააბონენტო ხელშეკრულებაში მითითებულ მაქსიმალურ სიჩქარემდე.

ხელშეკრულებაში მითითებული მაქსიმალური სიჩქარე შეთავაზების რეკლამირებულ სიჩქარეზე ნაკლები არ უნდა იყოს.

მიმწოდებელს აქვს უფლება მართოს ტრაფიკი მხოლოდ აუცილებელი ხანგრძლივობით და ის ვალდებულია კომისიას ამის შესახებ ტრაფიკის მართვიდან ორი დღის ვადაში აცნობოს:

• სასამართლოს გადაწყვეტილების ან უფლებამოსილების მქონე ორგანოს ადმინისტრაციულ-სამართლებრივი აქტის შესრულების მიზნით;
• მომხმარებლის ტერმინალური მოწყობილობის, ქსელით მიწოდებული მომსახურებებისა და თავად ქსელის ინტეგრაციისა და უსაფრთხოების დაცვის მიზნით;
• ქსელის მოსალოდნელი გადატვირთვის თავიდან აცილების და ქსელის მნიშვნელოვანი ან დროებითი გადატვირთვის შედეგების შემცირების მიზნით, იმ პირობით, რომ ტრაფიკის ერთგვაროვანი კატეგორიების გადაცემა მოხდება არადისკრიმინაციულად, თანაბარი პირობებით.

საბითუმო ინტერნეტ მომსახურება

საბითუმო ინტერნეტ მომსახურების ხელშეკრულებაში მითითებული უნდა იყოს შემდეგი პარამეტრები:

• ჯიტერი - გამოსახავს ქსელის გამტარუნარიანობის შეზღუდული შესაძლებლობით გამოწვეულ პაკეტების გაგზავნასა და მიღებას შორის არათანაბარ/არაერთგვაროვან დროის დაყოვნებას მილიწამებში;
• დაყოვნება - აჩვენებს მომხმარებლის ტერმინალურ მოწყობილობასა და ინტერნეტის გაცვლის წერტილს შორის, ორივე მიმართულებით, პაკეტების გაგზავნასა და მიღებას შორის დროის დაყოვნებას მილიწამებში;
• დაკარგული პაკეტების კოეფიციენტი - გამოსახავს დაკარგული პაკეტების პროცენტულ პროპორციას გაგზავნილი პაკეტების მთლიან რაოდენობაში;
• მომსახურების ხელმისაწვდომობა.

შემოწმების სისტემა

ინტერნეტ მომსახურების მიწოდების ხარისხი შემდეგი პარამენტებით შემოწმდება:

• ატვირთვისა და ჩამოტვირთვის დაკავშირების სიჩქარე;
• დაყოვნება;
• ჯიტერი;
• დაკარგული პაკეტების კოეფიციენტი.

გაზომვა უნდა ჩატარდეს სადენიან მიერთებაზე და არა Wi-Fi როუტერით მიწოდებულ მომსახურებაზე.

გაზომვების ჩატარება შეუძლია როგორც კომისიას, ისე აბონენტსა და ინტერნეტ მომსახურების მიმწოდებელს. ეს შესაძლებელი იქნება კომისიის ოფიციალურ ვებგვერდზე განთავსებული მომსახურების მიწოდების ხარისხის შემოწმების სისტემის მეშვეობით.

მომხმარებლის მიერ ჩატარებული გაზომვების რაოდენობა, მეტი სიზუსტისა და მოკლევადიანი ხარვეზის გამორიცხვის მიზნით, არ უნდა იყოს 20-ზე ნაკლები 2 დღის განმავლობაში და 10-ზე ნაკლები 1 დღის განმავლობაში.

შეუსაბამო ხარისხის გასაჩივრება

მომხმარებელს შეუძლია კომისიას მიმართოს იმ შემთხვევაში თუ ნებისმიერი 20 გაზომვიდან ერთ ხელშეკრულებაში მაინც არ დაფიქსირდა ხელშეკრულებაში მითითებული მომსახურების მაქსიმალური სიჩქარე.

ასევე, თუ 20 გაზომვის შედეგად 90 პროცენტში მაინც არ დაფიქსირდა ხელშეკრულებით განსაზღვრული მაქსიმალური სიჩქარე. ამასთანავე, თუ მინიმალურ სიჩქარეზე დაბალი სიჩქარე დაფიქსირდა.

საჩივრის მიღებიდან 24 საათის განმავლობაში კომისიამ უნდა ჩაატაროს დამატებითი გაზომვები.