რა ხდება: "დერეკ შოლესთან გამოვხატე ჩემი გულწრფელი იმედგაცრუება 2020-23 წლების ორი რევოლუციური მცდელობის გამო, რომელიც აშშ-ის ყოფილი ელჩის მხარდაჭერით და გარედან დაფინანსებული ენჯეოების მეშვეობით განხორციელდა", — დაწერა დღეს საქართველოს ღიად ანტიდასავლურმა პრემიერ-მინისტრმა ირაკლი კობახიძემ პლატფორმა X-ზე.

• კობახიძის თქმით, მაშინდელი მცდელობები წარმატებული რომ ყოფილიყო, "დღეს საქართველოში მეორე ფრონტი იქნებოდა გახსნილი."
• დერეკ შოლე არის ამერიკის შეერთებული შტატების სახელმწიფო მდივნის მრჩეველი.

კობახიძე: “გარდა ამისა, ბატონ შოლეს განვუმარტე, რომ სახელმწიფო დეპარტამენტის წარმომადგენლების მიერ გავრცელებული ცრუ განცხადებები გამჭვირვალობის შესახებ კანონთან და აქციებთან დაკავშირებით გვახსენებს ამერიკის ყოფილი ელჩის 2020-23 წლების მსგავს ცრუ განცხადებებს, რომლებიც მაშინაც უცხოური დაფინანსებით მოქმედი სუბიექტების მხრიდან ძალადობის წახალისებას და რევოლუციური პროცესების მხარდაჭერას ემსახურებოდა.

• ასევე, ბატონ შოლეს განვუმარტე, რომ ამ ფონზე ურთიერთობების გადატვირთვა განსაკუთრებულ ძალისხმევას საჭიროებს, რაც სამართლიანი და კეთილსინდისიერი მიდგომის გარეშე შეუძლებელია.
• ბატონ შოლესთან არ გამომიხატავს შეშფოთება ნიუ იორკში სტუდენტების პროტესტის ბრუტალური დარბევის გამო."

კონტექსტი: აშშ-ის სახელმწიფო მდივნის მრჩეველმა, დერეკ შოლემ, პლატფორმა X-ზე განაცხადა, რომ ის ესაუბრა საქართველოს პრემიერ-მინისტრ ირაკლი კობახიძეს რუსულ კანონთან დაკავშირებით.

• მისი განცხადების თანახმად, შეერთებულმა შტატებმა მოუწოდა საქართველოს ხელისუფლებას, კიდევ ერთხელ დაადასტუროს საქართველოს ერთგულება ევროატლანტიკური მომავლის მიმართ.

დერეკ შოლე: "პრემიერ-მინისტრ კობახიძეს გავუზიარეთ ჩვენი შეშფოთება საქართველოს ამჟამინდელ ტრაექტორიასთან დაკავშირებით – მთავრობის მტრული რიტორიკა და ანტიდემოკრატიული კანონმდებლობის მხარდაჭერა საფრთხეს უქმნის საქართველოს ევროატლანტიკურ მომავალს.

• შეერთებული შტატები მოუწოდებს საქართველოს მთავრობას, კიდევ ერთხელ დაადასტუროს საქართველოს ერთგულება ევროატლანტიკური მომავლის მიმართ, რაც ქართველების აბსოლუტური უმრავლესობის სურვილია."

2 მაისს განცხადება გაავრცელა საქართველოში ამერიკის შეერთებული შტატების მოქმედმა ელჩმა, რობინ დანიგანიმ და განაცხადა, რომ საქართველოს მთავრობის მაღალი თანამდებობის პირები მიიწვიეს აშშ-ის მაღალი თანამდებობის პირებთან სტრატეგიული პარტნიორობისა და აშშ-ის დახმარების შესახებ ნებისმიერი შეკითხვის განსახილველად. "სამწუხაროდ, ქართულმა მხარემ არჩია, რომ უარი ეთქვა ამ მოწვევაზე", — აღნიშნა ელჩმა.