ქართული ოცნების დაჟინებულ სურვილს, მიიღოს რუსული კანონი საქართველოში, თითქმის 1 თვეა, ხალხი მრავალათასიანი საპროტესტო აქციებით ეწინააღმდეგება თბილისსა და საქართველოს სხვა ქალაქებში. ხელისუფლება პერიოდულად იყენებს ძალას მშვიდობიანი დემონსტრანტების წინააღმდეგ, რის შედეგადაც დაზიანებული და დაკავებულია არაერთი მოქალაქე.

• საპროტესტო აქციები გაიმართება დღესაც, 7 მაისს.
• პროტესტი გაგრძელდება მთელი კვირის განმავლობაში საქართველოს სხვადასხვა რეგიონში, 11 მაისს კი დიდი საპროტესტო აქციაა დაანონსებული თბილისში.

დღეს, 7 მაისს

• პროტესტი თელავში: მოქალაქეები ერეკლე მეორეს ძეგლთან აპირებენ შეკრებას 18:00 საათისთვის, გზავნილით — "არა რუსულ კანონს, გაუმარჯოს დამოუკიდებელ საქართველოს."
• პროტესტი ქუთაისში: დემონსტრანტები მესხიშვილის თეატრთან შეიკრიბებიან 18:00 საათზე. მათ პროტესტს მსვლელობის სახე ექნება. "ცენტრალური მოედნიდან მსვლელობით გავემართებით რუსული ოცნების ოფისთან. ჩავივლით რუსთაველის გამზირს, გადავინაცვლებთ ჯავახიშვილის ქუჩით ბუხაიძის ქუჩაზე, ავალთ გამსახურდიაზე, აღმაშენებელი-ტაბიძის კვეთით დავბრუნდებით ქალაქის ცენტრალურ ნაწილში. ბოლო გაჩერება — რუსული რეჟიმის ქუთაისის ფილიალი (ქ. ქუთაისის მერია)", — აცხადებენ ორგანიზატორები.
• პროტესტი თბილისში: რუსულ კანონს ტრადიციულად, საქართველოს პარლამენტის შენობასთან გააპროტესტებენ დღეს თბილისშიც. აქცია 19:00 საათზე დაიწყება.
• 21:00 საათზე კი ასევე, თბილისში გაიმართება საქველმოქმედო კონცერტი დედაენის ბარში. ორგანიზატორების თანახმად, "შემოსული თანხა მოხმარდება საპროტესტო აქციების საჭიროებებს, დაჭერილი ხალხის ჯარიმებს თუ გირაოს."

მომდევნო დღეებში: საპროტესტო აქციები საქართველოს სხვა დიდ ქალაქებშიც გაგრძელდება. ამ დროის მონაცემებით, პროტესტი დაგეგმილია:

• 8 მაისი — გორი, ბორჯომი, ქუთაისი;
• 9 მაისი — ზუგდიდი;
• 10 მაისი — ბათუმი;
• 11 მაისი — თბილისი.

რა ვიცით 11 მაისს, თბილისში დაგეგმილი აქციის შესახებ: ევროპის დღესთან დაკავშირებით, დედაქალაქში რუსული კანონის საწინააღმდეგო მანიფესტაცია დაანონსდა.

"მინდა დაიმახსოვროთ ეს თარიღი — 11 მაისი. ყველამ ერთად მოვაწყოთ ძალიან დიდი მანიფესტაცია. დიდი, მშვიდობიანი, ძლიერი, თავდაჯერებული მანიფესტაცია. ჩაინიშნეთ ეს თარიღი. ყველამ ავიღოთ ეს დავალება, ის ადამიანები, ვინც ჯერ აქ [აქციაზე] არ ყოფილან, მოვიყვანოთ", — განაცხადა ლევან ცუცქირიძემ, 2 მაისს, გმირთა მოედანზე გამართული საპროტესტო აქციის ერთ-ერთმა ორგანიზატორმა.

• ევროპის დღის შესახებ: საქართველო, 2024 წელს, ევროპის დღეს, ევროკავშირის წევრობის კანდიდატის სტატუსით პირველად აღნიშნავს. ევროპის დღე ყოველწლიურად 9 მაისს აღინიშნება, თუმცა, ამ თარიღთან დაკავშირებული სახალხო ზეიმი, თბილისში, ექსპო ჯორჯიაში, შაბათს, 11 მაისს გაიმართება.

2024 წლის 3 აპრილს მმართველმა პარტიამ დაარღვია ერთი წლის წინ დადებული პირობა, რომ აღარ მიუბრუნდებოდა რუსული კანონის მიღების საკითხს.

• გასული, 2023 წლის მარტში, ანალოგიური კანონპროექტის ინიციირებას ხალხი პარლამენტის წინ აპროტესტებდა, სამართალდამცავებმა კი ისინი რამდენჯერმე დაშალეს წყლის ჭავლის, წიწაკის სპრეისა და ცრემლსადენი გაზის გამოყენებით.
• შემდეგ, მძლავრი საზოგადოებრივი წინააღმდეგობის ფაქტორის გამო, მმართველმა პარტიამ კანონპროექტი ჩააგდო და თქვა, რომ საკითხს აღარ მიუბრუნდებოდა: "მე, პირველ რიგში, გარანტიას გაძლევთ, რომ რუსული კანონი საქართველოს პარლამენტში არასდროს დაინიციირდება, ყოველ შემთხვევაში, ჩვენი ხელისუფლებაში ყოფნის პერიოდში. ნაცმოძრაობაზე თავს ვერ დავდებ, მაშინ იყო რუსული კანონები", — განაცხადა ირაკლი კობახიძემ 2023 წლის 9 მარტს, როდესაც ის მმართველი პარტიის თავმჯდომარე იყო