რა ხდება: 30-ზე მეტი ევროპარლამენტარი ევროკომისიის ვიცე-პრეზიდენტს, ევროკავშირის უმაღლეს წარმომადგენელს საგარეო და უსაფრთხოების პოლიტიკის საკითხებში, ჯოზეფ ბორელს მოუწოდებს, შეუჩერდეს საქართველოს ევროკავშირში გაწევრიანების კანდიდატის სტატუსი.

• ევროპარლამენტის წევრების თქმით, ქართული ოცნების მიერ ინიციირებული უცხოური აგენტების შესახებ კანონის რუსული ანალოგის მიღების პროცესში, მშვიდობიანი დემონსტრანტების წინააღმდეგ ძალის გამოყენების ფაქტები გასცდა დაშვებულ ზღვარს; ეს კი უფრო ზრდის დაძაბულობასა და პოლარიზაციას ქართულ პოლიტიკასა და საზოგადოებაში.
• განცხადების ავტორები არიან: რასა იუკნევიჩიენე, ანდრიუს კუბილიუსი, მირიამ ლექსმანი და ევროპარლამენტის სხვა 28 წევრი.

ღია წერილი: "საქართველოს ხელისუფლების მუდმივმა არადემოკრატიულმა ქცევამ, განსაკუთრებით მათ მიერ უცხოური აგენტების შესახებ რუსული სტილის კანონის გატანის აგრესიული მცდელობისა და მშვიდობიანი დემონსტრანტების მიმართ ძალის გამოყენებამ გადალახა ზღვარი. ამგვარმა საქციელმა კიდევ უფრო გაზარდა დაძაბულობა და პოლარიზაცია ქართულ პოლიტიკასა და საზოგადოებაში, რაც ეწინააღმდეგება იმ ცხრა ნაბიჯს, რომელთა გადადგმაზეც საქართველოს მთავრობამ პასუხისმგებლობა აიღო, როდესაც ქვეყანას მიენიჭა ევროკავშირის კანდიდატის სტატუსი.

• მოგიწოდებთ, გამოიჩინოთ მტკიცე პოზიცია და შემდეგი ზომები, რაც მკაფიო სიგნალს გაუგზავნის საქართველოს ხელისუფლებას.
• პირველი, საქართველოს ხელისუფლებისა და წამყვანი პარტიის "ქართული ოცნების" ქცევა ეწინააღმდეგება ევროკავშირის კანდიდატი ქვეყნის ვალდებულებებს, ამიტომ, საქართველოს კანდიდატის სტატუსი უნდა შეჩერდეს გაწევრიანების პროცესში შემდგომი პროგრესის გარეშე.
• მეორე, უნდა გადაიხედოს ევროკავშირის მიერ საქართველოს სახელმწიფო ბიუჯეტისა და სამთავრობო პროგრამების დაფინანსება.
• მესამე, საქართველოს პროგრესის შუალედური შეფასება 2023 წლის 8 ნოემბრის კომისიის რეკომენდაციაში მოცემული ცხრა ნაბიჯის განხორციელების შესახებ უნდა განხორციელდეს შეფერხების გარეშე. ეს ღონისძიება შეტანილია პარლამენტის 2024 წლის 25 აპრილის რეზოლუციაში საქართველოში უცხოელი აგენტების კანონის ხელახალი შემოღების მცდელობისა და სამოქალაქო საზოგადოების შეზღუდვების შესახებ.

ბოლო წლებში ჩვენ დაუღალავად ვმუშაობდით ქართველი ხალხისა და მისი ევროკავშირში გაწევრიანების მისწრაფებების მხარდასაჭერად. ჩვენ ახლაც მტკიცედ მივყვებით ამ გზას, მაგრამ დემოკრატიული კრიტერიუმები ევროკავშირის ყველა კანდიდატი ქვეყნისთვის არის იგივე და ისინი დაცული უნდა იყოს".

• [ტ/კ მთავარი არხის თარგმანი].

"კანონი გამჭვირვალობის შესახებ, რომელიც მეორე მოსმენით მიიღეს, არის მიუღებელი იმ ფორმით, როგორიცაა ახლა და ქმნის სერიოზულ წინააღმდეგობას ევროკავშირში ინტეგრაციასთან დაკავშირებით", — განაცხადა 2 მაისს გაფართოების საკითხებში ევროკომისიის გენერალურმა დირექტორმა ხერტ იან კოოპმანიმ საქართველოში ვიზიტისას. მან აღნიშნა, რომ "ახლა ბურთი ხელისუფლების მოედანზეა."

ბოლო ხაზი: საქართველოს ხელისუფლებას ღიად უცხადებენ სტრატეგიული პარტნიორები, მათ შორის, ამერიკის შეერთებული შტატების მაღალი თანამდებობის პირები, რომ რუსული კანონის მიღება ხელს შეუშლის საქართველოს ევროატლანტიკურ წრაფვას. "მრავალწლიანი პარტნიორობის შემდეგ, ჩვენ ვწუხვართ, რომ საქართველოს ევროატლანტიკური მისწრაფებები ახლა სასწორზე დევს. ჯერ კიდევ არის დრო იმ გზაზე დაბრუნების, რომელიც ქართველ ხალხს სურს და იმსახურებს", — განაცხადა დერეკ შოლემ, აშშ-ის სახელმწიფო დეპარტამენტის მდივანმა 4 მაისს.