ფსიქოლოგიური თრილერის მოყვარულებს ეს ამბავი განსაკუთრებით გაახარებს: სულ მალე ახალი ქართული სერიალი, უხილავი თამაში, დაიწყება. მარი ბექაურის ამავე სახელწოდების რომანის ეკრანიზაციას ქართველი მაყურებელი ზაფხულში იხილავს კავეა პლუსზე.

"სად არის სოფია გილგა?" — ამ შეკითხვით დაანონსდა უხილავი თამაში გასული წლის მიწურულს. ამასთან, მაშინ გავრცელდა სერიალის თიზერიც. ამჯერად კი, პროექტის შემქმნელებმა შემოგვთავაზეს პირველი ტრეილერი, რომლითაც სერიალის შესახებ უფრო მეტს ვიგებთ.

უხილავ თამაშში მაყურებელი ბევრ ნაცნობ და საყვარელ სახეს იხილავს. სერიალში მონაწილეობენ ნინო კასრაძე, თემიკო ჭიჭინაძე, გიორგი მახარაძე, გიორგი ლიფონავა, მურმან ჯინორია, კახა კინწურაშვილი, ეკა დემეტრაძე, გივიკო ბარათაშვილი, მაკა ჩიჩუა და სხვები.

ფოტო: სულაკაურის გამომცემლობა

უხილავი თამაში ცნობილი ქართველი მწერლის, მარი ბექაურის, ამ დროისთვის ბოლო რომანია, რომელიც სულაკაურის გამომცემლობამ 2022 წელს დაბეჭდა. წიგნი გვიყვება ორი ავტორის ირგვლივ განვითარებულ უცნაურ მოვლენებზე: "გამომცემლობაში ერთდროულად ორი მწერალი მოდის, ერთი — ცნობილი, მეორე — დებიუტანტი. ორივე რომანის დაწერას აპირებს, პირველი — მომავლის სამყაროზე და რობოტების შექმნილ ადამიანზე, მეორე — გაუჩინარებულ ფსიქიატრზე, რომლის ძიების პროცესშიც ბევრი უჩვეულო მოვლენა ხდება… თუმცა, ამ ვიზიტებიდან რამდენიმე თვის შემდეგ ცნობილი მწერალი სულ სხვა წიგნს გზავნის. დებიუტანტი მწერალი კი დირექტორს ეუბნება, რომ უჩვეულო ისტორია გადახდა თავს, რის გამოც წიგნის დაწერას ვეღარ შეძლებს და ზუსტად იმავე ამბავს ჰყვება, რაც დირექტორმა რამდენიმე დღით ადრე მეორე მწერლის წიგნში წაიკითხა…".

არაერთი ლიტერატურული პრემიის გამარჯვებული მარი ბექაური, რომლის მოთხრობები სხვადასხვა წლის საუკეთესო პროზის ანთოლოგიებშია შესული, ამავდროულად სცენარისტიცაა. იგი მუშაობდა GDS-ის გახმაურებულ სერიალზე ქერჩი. ბექაური ასევე იყო თანასცენარისტი მოკლემეტრაჟიანი ფილმისა 8 წუთი, რომელმაც საერთაშორისო აღიარება დაიმსახურა.

თუ სერიალებს თვალს აქტიურად ადევნებ, არ დაგავიწყდეს, შემოიხედო ჩვენს ჯგუფშიც – ერთი სერიაც და…