რა ხდება: პარტია ერთიანი ნაციონალური მოძრაობის (ენმ) პოლიტსაბჭოს წევრმა ლაშა ფარულავამ და პარტიის იურისტმა, ლაშა ტყეშელაძემ, გენერალური პროკურატურის შენობასთან ბრიფინგი გამართეს.

  • მათ მოუწოდეს უწყებას, გამოიძიოს ენმ-ის თავმჯდომარის, ლევან ხაბეიშვილის ცემის ფაქტი;
  • ენმ-ის მოთხოვნაა, საქმე აღიძრას 144-ე მუხლის პრიმა ნაწილით, რადგან "ლევან ხაბეიშვილზე უმოწყალოდ ძალადობდნენ 20 წუთის განმავლობაში და ჩვენი კანონით, ჩვენი კონსტიტუციით, ეს უტოლდება წამებას."
  • ლაშა ფარულავამ განაცხადა, რომ უწყებაში მიიტანეს ფოტო და ვიდეო მტკიცებულებები, რომელშიც ნაჩვენებია, თუ როგორ იძალადეს ლევან ხაბეიშვილზე "უშუალოდ, ბიძინა ივანიშვილის დავალებით."

დეტალები: ენმ მოითხოვს, სასწრაფოდ დაიწყოს გამოძიება ყველა იდენტიფიცირებული პირის მიმართ, რომელთა შორის, პარტიის მტკიცებით, არიან "ხარება, გოგა მემანიშვილი და ყველა ის რობოკოპი, რომლის სანომრე ნიშანი რამდენიმე სიუჟეტშიც არის ასახული."

  • ზედმეტსახელით — ხარება, მოიხსენიებენ ზვიად ხარაზიშვილს, რომელიც შსს-ს განსაკუთრებულ დავალებათა დეპარტამენტის დირექტორია.
  • ლაშა ტყეშელაძე: "მეშვიდე დღე დაიწყო და გამოძიება არ დაწყებულა, როცა მათი პირდაპირი ვალდებულებაა, დაეწყოთ გამოძიება ლევან ხაბეიშვილის თავდასხმის ეპიზოდზე და ასევე, ახალგაზრდების ცემის ფაქტზე;
  • დღეს დუმს საქართველოს პროკურატურა და დუმს მთავარი პროკურორი. დღეს დუმს კაციტაძის უწყება და მათ პირდაპირ კანონი ავალდებულებს, რომ აღნიშნული დანაშაული გამოიძიოს. ეს არის მათ კისერზე და ეს დანაშაული აუცილებლად უნდა გამოიძიონ. ეს არის უმოქმედობით ჩადენილი დანაშაული და ისჯება სისხლის სამართლით."

კონტექსტი: ლევან ხაბეიშვილს თავს დაესხნენ 1-ელი მაისს, ღამით, რუსული კანონის საწინააღმდეგო აქციაზე.

  • თავდასხმაში "ხარებას დაჯგუფება" დაადანაშაულა ლევან ხაბეიშვილმა, რომელიც თავდასხმიდან რამდენიმე საათში, დაზიანებების გამო, ეტლით მივიდა საკანონმდებლო ორგანოში.
ლევან ხაბეიშვილი თავდასხმის შემდეგ, პარლამენტის პლენარულ სხდომაზე. 2024 წლის 1-ელი მაისი.

ლევან ხაბეიშვილი თავდასხმის შემდეგ, პარლამენტის პლენარულ სხდომაზე. 2024 წლის 1-ელი მაისი.

ფოტო: სქრინი პირდაპირი ეთერიდან

"ხარებას დაჯგუფება მცემდა და მეუბნებოდნენ, რომ გრძელი ენა მაქვს და ხელისუფლებას ვაკრიტიკებ მუდმივად და იქნებ გავჩერდე. იძახდნენ, მოკალით და მერე თქვით, თავი დაარტყაო. მეუბნებოდნენ, რომ მეთქვა "ჩმორი ვარ", და ამ შემთხვევაში, არ მცემდნენ. ამაზე პასუხი როცა მიიღეს, კიდევ უფრო მეტი მომხვდა. არა რუსულ კანონს, კი ევროპას!", — განაცხადა ერთიანი ნაციონალური მოძრაობის თავმჯდომარემ, ლევან ხაბეიშვილმა პლენარულ სესიაზე სიტყვით გამოსვლისას.

ამასთან, ხაბეიშვილმა ისაუბრა იმის შესახებაც, თუ რა უძღოდა წინ მის დაკავებას. ენმ-ის ლიდერის თქმით, ის სატელევიზიო კომენტარს აკეთებდა, როდესაც დაინახა, როგორ "ითრევდნენ ახალგაზრდა ბავშვს" ე.წ. რობოკოპები და მის დასახმარებლად გაეშურა.

  • სამთავრობო-პროპაგანდისტული იმედის ვიდეო

ბოლო ხაზი: ცემის შემდეგ, ოპოზიციონერი დეპუტატი ინგოროყვას კლინიკაში გადაიყვანეს. შსს-მ დღეს განაცხადა, რომ ლევან ხაბეიშვილმა დაზიანება მაშინ მიიღო, როდესაც პოლიციელებისთვის საქმიანობაში ხელის შეშლის მიზნით შეიჭრა პოლიციის კორდონში.