ლეგენდარულმა ამერიკელმა მომღერალმა მადონამ თავისი მე-12 საკონცერტო ტურნე, The Celebration Tour, ბრაზილიაში დაასრულა. შვიდთვიანი მსოფლიო ტურნეს ბოლო კონცერტი 65 წლის პოპვარსკვლავმა რიო-დე-ჟანეიროში გამართა და მასზე დასწრება უფასო იყო. შედეგად, კოპაკაბანის პლაჟი მადონას მილიონზე მეტი ფანისთვის საცეკვაო მოედნად იქცა. კი, სწორად წაიკითხეთ — 4 მაისს გამართულ კონცერტს რიოში 1,6 მილიონზე მეტი ადამიანი ესწრებოდა, რითაც მადონამ რეკორდიც მოხსნა; ეს იყო სოლოკონცერტის ყველაზე დიდი აუდიტორია ისტორიაში.

ისტორიული ტურნეს ბოლო კონცერტზე დასასწრებად კი მადონას ფანები ბრაზილიაში მსოფლიოს სხვა ქვეყნებიდანაც ჩავიდნენ. კოპაკაბანის პლაჟის გავსების შემდეგ, პოპის დედოფალს სასტუმროს ნომრებიდან, ახლომდებარე ბინების აივნებიდან და ოკეანში მცურავი ნავებიდანაც კი უსმენდნენ.

ფოტო: António Lacerda / EPA

საკუთარი 40-წლიანი კარიერის აღსანიშნავად, მადონამ The Celebration Tour შარშან ოქტომბერში, ლონდონში გამართული კონცერტით დაიწყო. ჯამში, ტურნემ სამ კონტინენტზე 81 კონცერტი მოიცვა. კონცერტებზე მადონასთან ერთად სხვა ვარსკვლავებიც გამოჩნდნენ, მათ შორის, კაილი მინოუგი, FKA Twigs, Cardi B, ჟან-პოლ გოტიე და დონატელა ვერსაჩე.

300 მილიონზე მეტი გაყიდული ჩანაწერით, მადონა მუსიკის ისტორიაში ერთ-ერთი ყველაზე პოპულარული ფიგურაა. პოპის დედოფლად წოდებული მუსიკოსის კარიერა ითვლის ოთხ ათწლეულს, რომლის განმავლობაშიც მადონამ გაყიდვებით, ჩარტების ლიდერობით თუ ჯილდოების რაოდენობით არაერთი მსოფლიო რეკორდი დაამყარა. ამასთან, მომღერალმა ეპოქალური როლი შეასრულა უმცირესობებისა და მოწყვლადი ჯგუფების უფლებებისთვის ბრძოლაშიც.

თუ მუსიკა შენი ცხოვრების განუყოფელი ნაწილია და ამ თემაზე მეტის გაგება გინდა, შემოგვიერთდი ჯგუფში ერთი სიმღერაც და...