მოკლედ: 700-ზე მეტი მასწავლებელი, ერთობლივი განცხადებით, სოლიდარობას უცხადებს მასწავლებლის ეროვნული ჯილდოს მფლობელს, ლადო აფხაზავას, რომელსაც 5 მაისს, საკუთარ სახლთან თავს დაესხნენ.

  • განცხადებას, ამ დროისთვის, 712 მასწავლებელი აწერს ხელს.

დეტალები: მასწავლებლები წერენ, რომ აფხაზავაზე თავდასხმა არის "სახიფათო პრეცედენტი", რომელიც ახალისებს ძალადობას აქტიური სამოქალაქო პოზიციის მქონე მასწავლებლების წინააღმდეგ: "ძალადობაზე თვალის დახუჭვა ახალისებს ძალადობას, ასეთ გარემოში კი არავინ არის დაცული".

  • მასწავლებლები სამართალდამცავ ორგანოებს მოუწოდებენ, დროულად და ეფექტურად გამოიძიონ მომხდარი.

კონტექსტი: 5 მაისს, ლანჩხუთში, საკუთარ სახლთან, ლადო აფხაზავას თავს დაესხა ჯოხებით შეიარაღებული სამი ადამიანი.

  • აფხაზავას თქმით, თავდასხმის დროს, 20 წლის შვილთან ერთად იყო.
  • მისივე თქმით, სამივე თავდამსხმელს იცნობს, მათგან ერთი მისივე კორპუსში ცხოვრობს.

ლადო აფხაზავა მედიასთან ამბობს, რომ მასზე თავდასხმას, რუსული კანონის გაპროტესტებას და აქციებში მონაწილეობას უკავშირებს.

  • შინაგან საქმეთა სამინისტრომ აფხაზავაზე თავდასხმის შემდეგ, გამოძიება ძალადობის მუხლით დაიწყო.