რუსული კანონის დასაცავად, ხელისუფლებამ საკომუნიკაციო სტრატეგია რუსეთის დროშის ფერებში განაახლა

რა ხდება: ქართული ოცნების მაღალჩინოსნები ფეისბუქზე აქვეყნებენ პოსტერს, წარწერით — არა რუსულ კანონს, კი ევროპას, კი გამჭვირვალობას.

სწორედ სიტყვა "გამჭვირვალობა" მოიცავს რუსული კანონის ძირითად არსს, რამდენადაც ინიციირებულ კანონპროექტს ხელისუფლება მოიხსენიებს, როგორც კანონპროექტს უცხოური გავლენის გამჭვირვალობის შესახებ.

დეტალები: პოსტერებზე, რომელიც ქართული ოცნების აღმასრულებელმა მდივანმა მამუკა მდინარაძემ და თბილისის მერმა კახა კალაძემ გამოაქვეყნეს, მაღალჩინოსნებმა თან დაურთეს მინაწერები: "კი — ქართულ კანონს!", "მოდი ამაზე მყარად შევთანხმდეთ!"

რუსული კანონის მხარდასაჭერად მომზადებული პოსტერები იმეორებს რუსეთის დროშის ფერებს.

**კალაძის პოსტი რუსული კანონის მხარდასაჭერად**

მდინარაძის პოსტი რუსული კანონის მხარდასაჭერად — **კალაძის პოსტი რუსული კანონის მხარდასაჭერად**

კონტექსტი: მძლავრი საზოგადოებრივი წინააღმდეგობის, საერთაშორისო და სტრატეგიული პარტნიორების მოწოდებების მიუხედავად, შეაჩეროს საქართველოს მთავრობამ რუსული კანონის საპარლამენტო განხილვა, ქართული ოცნება მაინც იყენებს ყველა საკომუნიკაციო შესაძლებლობას იმის სამტკიცებლად, თითქოს, მათ მიერ ინიციირებული რუსული კანონი, რუსული არ არის.

ქართული ოცნება ცდილობს, გაიმეოროს სწორედ ის სტრატეგია, რაზეც ღიად, საჯაროდ ისაუბრა რუსეთის პრეზიდენტის პრესსპიკერმა, დმიტრი პესკოვმა, რომელმაც რუსულ კანონთან დაკავშირებით თქვა: "ჩვენ ალბათ, უბრალოდ, გვჭირდება, უფრო აქტიურად ავუხსნათ [მათ, ვისაც მწვავე და მკვეთრი რეაქცია აქვს], რომ აბსურდია ამის რუსულ პროექტად მიჩნევა".

მთავრობა მიმართავს ყველა ღონეს: როგორც მის დაქვემდებარებაში არსებულ პროპაგანდისტულ ტელეარხებს, ასევე

ინტერნეტრესურსებს,
სახელისუფლებო "ექსპერტებს";
სხვადასხვა პროპაგანდისტულ გავლენის ჯგუფებს;
ადმინისტრაციულ რესურსებს.

მმართველი პარტია, რომელსაც მსოფლიოში ერთ-ერთმა ყველაზე გავლენიანმა სოციალურმა ქსელმა, ფეისბუქმა, მცდარი ინფორმაციის გამო, პროპაგანდისტული გზავნილების გავრცელება შეუზღუდა, ახლა პლაკატებს აკრავს თითქმის ყველგან და ყველაფერზე, სადაც ქაღალდის მიწებებაა შესაძლებელი — გაჩერებებზე, მეტროებთან, შენობების კედლებზე, სამშენებლო აბრებზე და ნაგვის ურნებზეც კი.