თითქმის 2-წლიანი პაუზის შემდეგ სერიალი The Boys მე-4 სეზონით ბრუნდება! ზებუნებრივის სცენარისტ ერიკ კრიპკეს პოლიტიკური სატირა ბიჭები კომიქსების მიხედვითაა გადაღებული და ადამიანების სამყაროში მოხვედრილ სუპერგმირებზე მოგვითხრობს, თუმცა, მარველისგან განსხვავებით, შოუში სუპერგმირები სამყაროს გადარჩენის ნაცვლად, საკუთარი ძალაუფლებითა და პოპულარულობით ბოროტად სარგებლობენ, მათ შესაჩერებლად კი ერთმანეთისგან რადიკალურად განსხვავებული ადამიანები ერთიანდებიან.

სერიალის ახალი ტრეილერი ცოტა ხნის წინ გავრცელდა. ბუჩერი "ბიჭებს" უმხელს, რომ სულ ცოტა დრო აქვს დარჩენილი, პარალელურად კი "ბიჭების" ლიდერის პოზიციას შორდება და მათთან ურთიერთობის დალაგებას ცდილობს. როგორც ვხედავთ, "ბიჭები" მას ბევრი ტყუილის შემდეგ აღარ ენდობიან. ბუჩერი მიზნების მისაღწევად Supernatural-ის მსახიობ ჯეფრი დინ მორგანთან იწყებს თანამშრომლობას. როგორც ჩანს სცენარისტმა ერიკ კრიპკემ მორგანის დაყოლიება მაინც შეძლო და ის The Boys-ის გუნდს შეუერთდა.

როგორც ტრეილერიდანვე ვხვდებით, საინტერესო თავგადასავლები არც ამ სეზონში მოგვაკლდება.

სანამ The Boys-ს ველოდებოდით, მისი სპინოფის, Gen V-ის, ნახვაც მოვასწარით, რომელიც კვლავაც სუპერგმირების სამყაროზე მოგვითხრობს, თუმცა ამჯერად საქმე კოლეჯის სტუდენტებს ეხებოდათ. ტრეილერის მიხედვით, Gen V-ის რამდენიმე პერსონაჟს The Boys-შიც ვნახავთ.

სეზონის პირველი სამი ეპიზოდის პრემიერა 13 ივნისს შედგება, მომდევნო სერიები კი კვირაში ერთხელ გამოვა.