რა ხდება: დღეს, 3 მაისს, თბილისში, სასტუმრო პარაგრაფში, აზიის განვითარების ბანკის (ADB) პრეზიდენტის მიღება იმართება. ღონისძიებას ხელისუფლების ოფიციალური პირები დაესწრებიან.

  • დღეს დაგეგმილი პროტესტი, სახელწოდებით — გააგონე საქართველოს ხმა, ორგანიზატორების თანახმად, მიზნად ისახავს, "შევიკრიბოთ სასტუმრო პარაგრაფის წინ და ვუთხრათ მაღალი რანგის საერთაშორისო სტუმრებს, რომ ღიად მოუწოდონ საქართველოს მთავრობას, გაიწვიოს რუსული კანონი და არ შეუქმნას საფრთხე ქვეყნის მდგრად და დემოკრატიულ განვითარებას!"

განცხადებიდან: "2-5 მაისს, ADB თავის 57-ე წლიურ შეხვედრას თბილისში მართავს, რუსული რეჟიმის წინააღმდეგ მიმდინარე საპროტესტო აქციების ფონზე.

  • იმის პარალელურად, რომ ქვეყნის მმართველი პარტია ომს უცხადებს ყველა საერთაშორისო თანამეგობრობას, როგორც ქვეყნის შიგნით, ისე მის გარეთ, და რუსული კანონის მიღებით საფრთხეში აყენებს ქვეყნის დემოკრატიულ განვითარებას, მთავრობის წარმომადგენლები ADB-ის წლიური შეხვედრების ფარგლებში 70-მდე ღონისძიებას გეგმავენ საქართველოს ეკონომიკური განვითარების ტენდენციებზე სამსჯელოდ."

რა ვიცით ღონისძიების შესახებ:

  • ფინანსთა სამინისტროს თანახმად, წლიური შეხვედრების ფარგლებში გაიმართება 70-მდე ღონისძიება, რომელთა ფარგლებშიც სხვადასხვა რანგის სტუმრებს შესაძლებლობა ექნებათ, იმსჯელონ ეკონომიკური განვითარების ტენდენციებსა და საერთაშორისო საფინანსო ინსტიტუტების როლზე ეკონომიკური განვითარების მიზნების მიღწევაში, მათ შორის, კლიმატის ცვლილების, სხვა გლობალური კრიზისული გამოწვევების როლზე.
  • საქართველოში 30 აპრილს, ცოლთან ერთად ჩამოვიდა აზიის განვითარების ბანკის პრეზიდენტი მასაცუგუ ასაკავა ADB-ის 57-ე წლიური შეხვედრის ფარგლებში.