აზერბაიჯანში დაპატიმრებულ მედია ადვოკატსა და ტოპლუმ ტვ-ს თანადამფუძნებელს, ალასგარ მამადლის არ აძლევენ საშუალებას, გაიკეთოს წანაზარდის ბიოფსია, რომელიც მას ყელზე აქვს.

მამადლი აზერბაიჯანის ხელისუფლებამ მარტში დააკავა, დამოუკიდებელ ონლაინ ტელევიზიაზე, Toplum TV-ზე განხორციელებული რეიდის დროს.

მისმა ადვოკატმა, ზიბეიდა სადიგოვამ, ოთხშაბათს თქვა, რომ მამადლის აქვს ფარისებრი ჯირკვლის ტკივილი, 23 მმ-იანი შეშუპების გამო.

"საჭიროა სასწრაფო ბიოფსია და დაუყოვნებლივ უნდა დაიწყოს მკურნალობა, მაგრამ რატომღაც, უკვე თვეზე მეტია, ამისთვის არანაირი სერიოზული ზომები არ ყოფილა მიღებული", — წერს სადიგოვა ფეისბუქზე.

მამადლის ძმამ, ნასიმი მამადლიმ თქვა, რომ მისი ძმას ექიმებმა აპრილში უთხრეს, აუცილებლად გაეკეთებინა ბიოფსია, თუ წანაზარდის ზომა 15 მმ-ს გადააჭარბებდა, რათა დაედგინათ, იყო თუ არა ეს სიმსივნური.

ნასიმი მამადლიმ OC Media-ს განუცხადა, რომ ამის შემდეგ მისი ძმის ჯანმრთელობის მდგომარეობა მას გაუარესდა, მას აღენიშნებოდა ხელის კანკალი და ძილის დროს სუნთქვის გაძნელება.

"სახეზე ფერი აქვს დაკარგული. ვშიშობთ, რომ თუ ამ მდგომარეობას ექნება გავლენა მის ორგანოებზე, მომავალში ვერაფრის გაკეთებას ვეღარ შევძლებთ", — თქვა მან.

ნასიმი მამადლის თქმით, მისი ძმა 8 მარტს, კლინიკასთან დააკავეს, სადაც ის ფარისებრი ჯირკვლის ბიოფსიისთვის იყო მისული.

ალასგარ მამედლის ექიმმა, აიდინ ალიევმა OC Media-ს განუცხადა, რომ მამადლის აღენიშნებოდა კისრის ტკივილი და გულისრევა, ასევე, გამოკვლევისას მათ აღმოაჩინეს ნიშნები, რომ შესაძლოა, პანკრეასიც იყოს რისკის ქვეშ, ამილაზას ფერმენტების გადაჭარბებული გამომუშავების შემდეგ.

ალიევმა, ასევე თქვა, რომ სასჯელაღსრულების დაწესებულების კლინიკაში პატიმარს მხოლოდ ექოსკოპია გაუკეთეს და უთხრეს, რომ ჯანმრთელი იყო. თუმცა, ამ კვლევამაც აჩვენა, რომ მისი ფარისებრი ჯირკვალი მნიშვნელოვნად იყო გაზრდილი.

ნასიმი მამადლიმ OC Media-ს განუცხადა, რომ პროკურორები, რომლებიც იძიებდნენ Toplum TV-ს საქმეს, დაჰპირდნენ, რომ მედია ადვოკატს მისცემდნენ საჭირო სამედიცინო გამოკვლევების ჩატარების საშუალებას, მაგრამ ბიოფსია ამ დრომდე არ ჩასტარებია.

აზერბაიჯანის კანონმდებლობით გარანტირებულია პატიმრების უფლება, მიიღონ სამედიცინო დახმარება და გამოკვლევები.

მამადლის ოჯახმა დახმარებისთვის სახალხო დამცველის აპარატს მიმართა, მაგრამ მიიღეს საპასუხო წერილი, რომელშიც ნათქვამია, რომ მეტი ინფორმაცია სჭირდებოდათ.

მამადლის ჯანმრთელობის მდგომარეობის შესახებ დეტალური ინფორმაციის გაგზავნის შემდეგ, პასუხი აღარ მიუღიათ.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.