პრემიერმინისტრის სპეციალური წარმომადგენელი, ზურა აბაშიძე პრაღაში რუსეთის საგარეო საქმეთა მინისტრის მოადგილეს, გრიგორი კარასინს შეხვდება. აბაძიშის განმარტებით, შეხვედრაზე საუბრის მთავარი თემა გიგა ოთხოზორიას მკვლელობის საქმე იქნება:

„ჩვენ გვაქვს დღის წესრიგი, რომელიც უმთავრესად მოიცავს სავაჭრო ეკონომიკურ ურთიერთობებს, სატრანსპორტო კომუნიკაციების საკითხებს, ასევე ჰუმანიტარულ თემებს. როდესაც ჰუმანიტარულ საკითხებზე ვსაუბრობ, მხედველობაში მაქვს უმთავრესად ჩვენი მოქალაქეების პრობლემა, რომლებიც რუსეთში ჯაშუშობის ბრალდებით იხდიან სასჯელს“.

აბაშიძემ ასევე აღნიშნა, რომ გასულ პერიოდში ქართულმა მხარემ უკვე გაათავისუფლა 6 მოქალაქე და იმედი გამოთქვა, რომ უახლოეს დღეებში კიდევ ერთი მათგანი დაუბრუნდება საქართველოს.