ენერგეტიკის მინისტრის, კახა კალაძის განცხადებით, იმ შემთხვევაში თუ მეზობელი ქვეყნები საქართველოს ბუნებრივი აირის მოთხოვნებს ბოლომდე ვეღარ დააკმაყოფილებს, გაზპრომიდან გაზის მიღებაში ის ვერანაირ პრობლემას ვერ ხედავს:

"რა თქმა უნდა, ძალიან ცუდი იქნება, თუ ჩვენ დავიწყებთ იმაზე საუბარს, რომ ჩავანაცვლოთ ჩვენი სტრატეგიული პარტნიორი აზერბაიჯანი და მთლიანად შემოვიყვანოთ გაზპრომი. ეს, რა თქმა უნდა, ცუდი იქნება".

კალაძის განმარტებით, ამ ეტაპზე საქართველო გაზპრომთან მიმართებით იმავე პოზიციაზე რჩება, რომელზეც წლების განმავლობაში იმყოფებოდა. მისი თქმით, რუსულ ენერგო კოპმანიასთან სიტყვიერი შეთანხმება იმის შესახებ, რომ რუსეთიდან სომხეთისაკენ მიმავალი ტრანზიტული ბუნებრივი აირის 10%-ს მიიღებს საქართველო, უკვე მიღწეულია:

"ხელშეკრულება გაზპრომთან გაფორმებული არ არის, თუმცა უახლოეს დღეებში გაფორმდება. შეთანხმება სიტყვიერად მიღწეულია, ხოლო წერილობითი შინაარსი გადავუგზავნეთ გაზპრომს".

კალაძის განმარტებით, ამ ეტაპზე საქართველოს ბუნებრივი აირის მიღება სამი გზით შეუძლია: სოკარის მილსადენით, შაჰ-დენიზიზს მილსადენით და რუსეთის იმ ტრანზიტული ბუნებრივი აირის 10%-ის, რომელსაც ის სომხეთს აწვდის.

ენერგეტიკის მინისტრმა აღნიშნა, რომ პრობლემა, რომელიც ბუნებრივი აირის სოკარის ე.წ. ყაზახის მილსადენით დამატებითი მოცულობების ტექნიკური მოწოდების შესაძლებლობაში იყო, აღმოფხვრილია:

"დღეს, ერთობლივი მუშაობით, ეს პრობლემა არის მოგვარებული, გადაჭრილი".

კალაძემ ასევე განმარტა, რომ მომავალი წლების განმავლობაში საქართველოს შესაძლებლობა ექნება ბუნებრივი აირი შაჰ-დენიზის მილსადენიდან მივიღოთ".