დე-ფაქტო აფხაზეთის სამხედრო სასამართლომ არ დააკმაყოფილა ადგილობრივი სამხედრო პროკურატურის მოთხოვნა გიგა ოთხოზორიას მკვლელობაში ბრალდებულ რაშიდ კანჯი ოღლისთვის წინასწარი პატიმრობის შეფარდების შესახებ. სასამართლომ ოთხოზორიას მკვლელობაში ბრალდებულს მხოლოდ შინაპატიმრობა შეუფარდა. ინფორმაციას დე-ფაქტო აფხაზეთის პროკურატურაზე დაყრდნობით საინფორმაციო სააგენტო Abkhazinform ავრცელებს.

თვითმხილველების ინფორმაციით, ოკუპირებული აფხაზეთის მესაზღვრემ, რაშიდ კანჯი ოღლიმ, საქართველოს მოქალაქე გიგა ოთხოზორია 2016 წლის 19 მაისს საქართველოს კონტროლირებად ტერიტორიაზე, ადმინისტრაციულ საზღვართან ახლოს მოკლა.

საქართველოს მთავარმა პროკურატურამ კანჯი-ოღლის განზრახ მკვლელობის მუხლი წაუყენა და სასამართლომ მას დაუსწრებლად შეუფარდა პატიმრობა. მას ბრალი აფხაზეთშიც განზრახ მკვლელობის მუხლით აქვს წაყენებული.

საქართველოს შინაგან საქმეთა მინისტრმა გიორგი მღებრიშვილმა აფხაზ სამართალდამცავებს რაშიდ კანჯი ოღლის დაკავებისკენ მოუწოდა, რადგან მინისტრის თქმით, არსებობს მისი ლიკვიდაციის საფრთხე, რაც შესაძლოა, საქართველოს დაბრალდეს და ეს გამოიყენონ კონფლიქტის ესკალაციისთვის.