თბილისის სააპელაციო სასამართლო ტელეკომპანია რუსთავი 2-ის გენერალური დირექტორის ბრალდების პასუხად განმარტავს, რომ რუსთავი 2-ის საქმეზე დასაბუთებული გადაწყვეტილება სასამართლომ 12 დღეში გადასცა მხარეებს, რადგან სამოქალაქო საპროცესო კოდექსის 257-ე მუხლის მე-2 ნაწილის თანახმად, სარეზოლუციო ნაწილის გამოცხადებიდან 14 დღის ვადაში სასამართლო ვალდებულია მოამზადოს აღნიშნული დოკუმენტი.

სააპელაციო სასამართლო აცხადებს, რომ იგი საკუთარი დისკრეციის ფარგლებში მოქმედებდა:

"ყოველგვარი საუბარი, რომ სააპელაციო სასამართლოს კოლეგიის ქმედება გასულია კანონის ჩარჩოებიდან, არ შეესაბამება სინამდვილეს და მიზნად ისახავს სასამართლოს დისკრედიტაციასა და საზოგადოების შეცდომაში შეყვანას".

სააპელაციოს განმარტებით, 2591 მუხლი, რომელზეც მხარის მიერ ხდება მითითება, ის სპეციალური მუხლია, სადაც განსაზღვრულია მხარის მხოლოდ ვალდებულება გამოცხადდეს სასამართლოში არაუადრეს 21 და არაუგვიანეს 30 დღისა გადაწყვეტილების ჩასაბარებლად. თუკი იგი თავს აარიდებს ამ მოვალეობას, გადაწყვეტილება ჩაითვლება ჩაბარებულად და დაიწყება ვადის ათვლა 30 დღიდან.

სასამართლოს განცხადებში ნათქვამია, რომ 2591 მუხლის მე-2 ნაწილი იმპერატიულად ადგენს თუ რა კატეგორიის მხარეებთან მიმართებაშია ვალდებული სასამართლო გაუგზავნოს სასამართლო გადაწყვეტილება, რაც არანაირად არ გამორიცხავს სასამართლოს უფლებას საკუთარი შეხედულებისამებრ გაუგზავნოს ნებისმიერ სხვა მხარეს, მით უფრო თუ იგი 21 დღეზე ადრე იქნა მომზადებული. ასევე განმარტავენ, რომ კანონში არ არსებობს ამკრძალავი ნორმა, რომელიც მოსამართლეს უზღუდავს უფლებას გაუგზავნოს კორესპონდენციები მხარეებს მათ შორის სასამართლო გადაწყვეტილება.

სააპელაციო სასამართლოს მიერ გავრცელებულ განცხადებაში ასევე წერია, რომ საკასაციო საჩივრის შეტანის ვადა კანონით განსაზღვრულია 21 დღით, მისი ათვლა კი იწყება გადაწყვეტილების მხარისათვის გადაცემიდან ან იმ მომენტიდან, როდესაც მოსამართლე გამოაცხადებს დასაბუთებულ გადაწყვეტილებას და ამას ესწრება მხარე:

"ფუნდამენტალური ღირებულებაა მხარეს ჰქონდეს 21 დღე მას შემდეგ, როდესაც დასაბუთებულ გადაწყვეტილებას გაეცნობა, რაც მოცემულ შემთხვევაში არ დარღვეულა".

სააპელაციო აბსურდულს უწოდებს იმას რომ მხარეებს გასაჩივრების ვადის დინება ეწყებათ სარეზოლუციო ნაწილის გამოცხადებიდან 30-ე დღეს:

"დასაბუთებული გადაწყვეტილების გამოცხადებიდან მათ აქვთ 21 დღე, რაც შეიძლება მოსამართლის დისკრეციით განხორციელდეს საქმის განხილვის დასრულებიდან ნებისმიერ გონივრულ დროს და აქედან დაიწყოს ვადის ათვლა".

სასამართლო ასევე აცხადებს, რომ ტელეკომპანია საქართველო არ იმყოფებოდა საქმეში მითითებულ მისამართზე და წარმომადგენლებმა უარი თქვეს სასამართლო გადაწყვეტილების ჩაბარებაზე:

"ყველა წარმომადგენელმა (პირადად და/ან ოფისის წარმომადგენლების მიერ) უარი განაცხადა სასამართლო გადაწყვეტილების ჩაბარებაზე, რაც 75-ე მუხლის პირველი ნაწილისა და 76-ე მუხლების შესაბამისად ითვლება არასაპატიოდ და/ან წარმოადგენს უარის თქმას".