ტელეკომპანია რუსთავი 2–ის დირექტორი ნიკა გვარამია აცხადებს, რომ ისინი არ აპირებენ დაემორჩილონ სასამართლოს გადაწყვეტილებას, რომელიც მისი თქმით, უკანონოა:

"ჩვენ არ ვაპირებთ ამ შენობიდან გასვლას იმ გადაწყვეტილებების საფუძველზე, რომელიც არ ემყარება კანონსა და კონსტიტუციას პირიქით, არღვევს მათ. თუ გნებავთ ჩვენი დასისხლიანებული სახეების ყურება ჩვენი დარბევის შედეგად, თქვენ მიიღებთ ამ სახეებს. მე მინდა წავიკითხო ერთი წინადადება ადამიანის უფლებათა დეკლარაციიდან: ვინაიდან აუცილებელია ადამიანის უფლებებს იცავდეს კანონის ძალა იმის უზრუნველსაყოფად, რათა ადამიანი იძულებული არ გახდეს მიმართოს აჯანყებას, როგორც უკანასკნელ საშუალებას ტირანიისა და ჩაგვრის წინააღმდეგ. მე მოგიწოდებთ, დაგვიტოვოთ ჩვენი უფლებების დაცვის კანონისმიერი მექანიზმები".

აუცილებელია ადამიანის უფლებებს იცავდეს კანონის ძალა იმის უზრუნველსაყოფად, რათა ადამიანი იძულებული არ გახდეს მიმართოს აჯანყებას, როგორც უკანასკნელ საშუალებას ტირანიისა და ჩაგვრის წინააღმდეგ.

ნიკა გვარამია

როგორც გვარამიამ ტელეკომპანიაში გამართულ ბრიფინგზე განაცხადა, სააპელაციო სასამართლომ მათ ნაადრევად გაუგზავნა გადაწყვეტილება, რისი უფლებაც არ ჰქონდა, რადგან სააპელაციო სასამართლო როგორც წესი, მხარეებს თავის გადაწყვეტილებას არ უგზავნის. გვარამიას თქმით, მხარეებმა სააპელაციოს გადაწყვეტილება სასამართლოდან თავისით უნდა წამოიღონ არაუადრეს 20 და არაუგვიანეს 30 დღისა. რუსთავი 2–ის გენერალური დირექტორის თქმით, ისინი 30–ე დღეს აპირებდნენ ამ გადაწყვეტილების წამოღებას, რათა დრო მოეგოთ. გვარამიას ინფორმაციით, სააპელაციო სასამართლო მხოლოდ სოციალურად დაუცველებსა და პატიმრებს უგზავნის თავის გადაწყვეტილებას ფოსტით, მეტს – არავის:

"ჩვენ 18 დღე მოგვპარეს, 18 დღე გასაჩივრებისთვის. რეალურად, ეს არის ჩვენთვის მოპარული ვადა, მაგრამ ეს ასევე არის საკონსტიტუციო სასამართლოსთვის მოპარული ვადა იმისათვის, რომ მან ვერ მოასწროს გადაწყვეტილების მიღება 54–ე მუხლთან დაკავშირებით, რომელიც ჩვენ გასაჩივრებული გვაქვს და რომელიც არის ერთადერთი, რომელსაც ეყრდნობა სააპელაციო სასამართლო თავის გადაწყვეტილებაში.

ჩვენ გადაწყვეტილება არ ჩავიბარეთ, რადგან ეს იყო უკანონო აქტი, მაგრამ ერთ–ერთ მხარეს ეს გადაწყვეტილება გადაეცა და აქედან ვფლობთ ჩვენ ინფორმაციას. მივმართავ იუსტიციის უმაღლეს საბჭოს და ამჯერად უზენაესი სასამართლოს თავმჯდომარეს: საქმე არის ძალიან მაღალი საზოგადოებრივი ინტერესის. მოვითხოვთ დღის ბოლომდე, ან არაუგვიანეს ხვალ დილამდე თქვენს განმარტებას: რას აკეთებს სააპელაციო სასამართლო? რა ქმედებებია ეს? საიდან იწყება ჩვენი საკასაციო საჩივრის ათვლის ვადა? რატომ გამოგვიგზავნა სასამართლომ გადაწყვეტილება და რატომ გადაიხადა ფოსტის ფული, რაც არათუ ევალება, ეკრძალება".