თბილისის მერობის კანდიდატი, ზალიკო უდუმაშვილი ცესკოს ოფიციალურ შედეგებს ელოდება და აცხადებს, რომ ეგზიტპოლი, რომელიც რუსთავი 2-მა გამოაქვეყნა 18 საათის მონაცემებისაა. ამას გარდა, უდუმაშვილის თქმით, კვლევის ცდომილებამ და 18-დან 20 საათამდე მისული ამომრჩევლის ხმებმა, შესაძლოა, სურათი შეცვალოს:

"ვერავინ დამაჯერებს, რომ არჩევნებზე მისულმა ყოველმა მეორე თბილისელმა კახი კალაძეს მისცა ხმა. ამიტომ ვაცხადებთ, ყველა პარტიამ დავიცვათ ჩვენი ხმები და არ მივცეთ ტოტალური გაყალბების საშუალება ქართულ ოცნებას."

უდუმაშვილის შეფასებით, დღევანდელი არჩევნები იყო სპეცოპერაცია ქართველი ხალხის წინააღმდეგ. მისი მტკიცებით, ქართული ოცნების წარმომადგენლები ამომრჩეველს აკონტროლებდნენ:

"გვაქვს ინფორმაცია, რომ ჩვენს მომხრეებს, რომლებიც აპირებდნენ მოსვლას არჩევნებზე, მათ ურეკავდნენ და აშინებდნენ, რომ ისინი არ მისულიყვნენ არჩევნებზე. იმ ინფორმაციასაც ვფლობთ, რომ კახი კალაძე ზუსტად აპირებდა გარკვეული პროცენტის დაწერას და ამისთვის იბრძოდა ზუსტად, რომ ეს პროცენტი დაეწერა. ჩვენ მივიღეთ შედეგი, როდესაც ქართული ოცნება წავიდა ქართველი ხალხის წინააღმდეგ და თბილისელების წინააღმდეგ."

ტელეკომპანია რუსთავი 2-ის ეგზიტპოლის 18 საათის მონაცემებით, თბილისში მერის არჩევნებში ქართული ოცნების მერობის კანდიდატმა, კახა კალაძემ 54% პროცენტი მიიღო, ზალიკო უდუმაშვილმა 15%, ხოლო ალეკო ელისაშვილმა - 14. თუ ცესკო-ს შედეგები რუსთავი 2-ის ეგზიტპოლის მსგავსი იქნება, მეორე ტური არ გაიმართება.

სხვა კანდიდატების შედეგები ასე გამოიყურება:

  • ზაალიკო უდუმაშვილი - 15%;
  • ალეკო ელისაშვილი - 14%;
  • ელენე ხოშტარია - 7%
  • კახა კუკავა - 3%
  • ირმა ინაშვილი - 3%
  • გიორგი ვაშაძე - 2%

კვლევის მეთოდოლოგია

რუსთავი 2

ტელეკომპანია რუსთავი 2-ის დაკვეთით კვლევა დღეს, 21 ოქტომბერს ედისონ რისერჩმა საფასურის სანაცვლოდ ჩაატარა, თუმცა რესპონდენტები არ იხდიან ფულს და გამოკითხვა ამ ნაწილში უფასოა. კვლევის ცდომილება 3 პროცენტია.

რესპონდენტები კვლევისთვის პირისპირი გამოკითხვის მეთოდით, თვითადმინისტრირებული კითხვარით გამოიკითხნენ თბილისში (კითხვარი).