მოძრაობა "ხმის" ინიციატივას სასკოლო კვებასთან დაკავშირებით, "საჯარო მოსამსახურეთა დამოუკიდებელი პროფესიული კავშირი — კონსტიტუციის 78-ე მუხლიც" უერთდება და მიიჩნევს, რომ ამ პროგრამის ამოქმედება იქნება მნიშვნელოვანი მხარდამჭერი ნაბიჯი ყველა ოჯახისთვის, მიუხედავად იმისა, არის თუ არა ის სოციალურად დაუცველი — ინფორმაციას ამის შესახებ "საჯარო მოსამსახურეები — კონსტიტუციის 78-ე მუხლი" სოციალურ ქსელში ავრცელებს.

მათი თქმით, უფასო სასკოლო კვების მოთხოვნით ხელმოწერების შეგროვება მალე დაიწყება და მოუწოდებენ საჯარო მოხელეებს და მოქალაქეებს, რომ შეუერთდნენ ამ ინიციატივას.

"საჯარო მოსამსახურეთა დამოუკიდებელი პროფესიული კავშირი - კონსტიტუციის 78-ე მუხლი" უერთდება მოძრაობა "ხმის" ინიციატივას სასკოლო კვებასთან დაკავშირებით და მიიჩნევს, რომ ამ პროგრამის ამოქმედება იქნება მნიშვნელოვანი მხარდამჭერი ნაბიჯი ყველა ოჯახისთვის, მიუხედავად იმისა, არის თუ არა ის სოციალურად დაუცველი. უფასო სასკოლო კვების მოთხოვნით ხელმოწერების შეგროვება მალე დაიწყება. მოგიწოდებთ საჯარო მოხელეებს და არა მარტო თქვენ, შეუერთდეთ ამ ინიციატივას, ხოლო რატომ უნდა შემოუერთდეთ, გაეცანით ფაქტებს:

სასკოლო კვების პროგრამა მსოფლიოში აღიარებულია, როგორც ბავშვებსა და ოჯახებზე მორგებული ყველაზე ეფექტიანი სოციალური დაცვის პროგრამა. ის არა მარტო ბავშვთა კეთილდღეობაზე აისახება, არამედ ხელს უწყობს მშობლებს დროისა და ფინანსების თვალსაზრისით.

2024 წელს სოციალურად დაუცველთა ბაზაში რეგისტრირებული იყო 18 წლამდე ასაკის 369,924-ს არასრულწლოვანი, აქედან საარსებო შემწეობას იღებდა 270,712. 2025 წელს ამავე ბაზაში რეგისტრირებული არასრულწლოვნების რაოდენობამ 379 957-ს მიაღწია, ხოლო საარსებო შემწეობის მიმღებ ბავშვთა რაოდენობა 278 639-მდე გაიზარდა.

Unicef-ის კვლევის მიხედვით, სასკოლო საათებში კვებას ქართველი მოსწავლეების მხოლოდ მეოთხედი ახერხებს. ამის მიზეზი არამხოლოდ ოჯახის სოციალურ-ეკონომიკური მდგომარეობაა, არამედ სკოლებში ჯანსაღი და რაც მთავარია, უსაფრთხო საკვების არარსებობა.

სხვადასხვა დროს გამოკითხული ქართველი მოსწავლეების უმრავლესობა აფიქსირებს, რომ სასკოლო საათებში ხშირად განიცდის შიმშილს.

დღესდღეობით, სხვადასხვა მონაცემების მიხედვით, ქვეყნის მასშტაბით, საჯარო სკოლების მხოლოდ 25 პროცენტშია ფუნქციური ბუფეტი და ხშირ შემთხვევაში ის მხოლოდ ქალაქის ტიპის დასახლებებში არსებულ სკოლებში გვხდება.

კვლევები ადასტურებს, რომ ჯანსაღი და დაბალანსებული კვება აუცილებელია სასკოლო ასაკის ბავშვებში კოგნიტური უნარების განვითარებისთვის. მშიერია თუ მაძღარი ბავშვი, ეს პირდაპირ აისახება მის დასწავლის უნარზე და ქცევაზე, ხოლო არაპირდაპირ ხელს უწყობს აკადემიური შედეგების გაუმჯობესებას.

ქვეყნის განვითარება და მისი ხვალინდელი დღე მომავალი თაობის ხელშეწყობაზეა დამოკიდებული, სასკოლო კვების მხარდაჭერა კი ამ მიმართულებით გადადგმული მნიშვნელოვანი ნაბიჯია" — ვკითხულობთ სოციალურ ქსელშუ გამოქვეყნებულ განცხადებაში

ცნობისთვის, მოძრაობა "ხმა" უფასო საკოლო კვების დასანერგად ხელმოწერების შეგროვებას იწყებს. ისინი საკანონმდებლო ინიციატივის წარდგენას აპირებენ, რასაც 25 000 ფიზიკური ხელმოწერა სჭირდება.

მოძრაობა "ხმის" ორგანიზებით 2023 წელს, თბილისში "მარში შიმშილის წინააღმდეგ" გაიმართა. მარშის მთავარი მიზანი შიმშილთან ბრძოლა იყო, რაც, მათი თქმით, სკოლებში უფასო კვების დანერგვით უნდა დაწყებულიყო.