საარჩევნო კანონმდებლობის რამდენიმე დარღვევა და ამომრჩევლის ნებაზე კონტროლის არაერთი შემთხვევა, - ასეთია საქართველოს ახალგაზრდა იურისტთა ასოციაციის პირველი შეფასება თვითმმართველობის არჩევნების დაწყებიდან ორ საათში.

ორგანიზაციის ინფორმაციით, რიგ უბნებზე რეგისტრატორების გვერდით, უკან ან ნაკადის მომწესრიგებელთან დგანან საარჩევნო სუბიექტის: ქართული ოცნების, მემარცხენე ალიანსის ან სადამკვირვებლო ორგანიზაცია ახალი სიტყვის წარმომადგენლები და ინიშნავენ უბანზე მოსული ამომრჩევლის მონაცემებს, სავარაუდოდ, მათ ვინაობას და ამომრჩევლის სიაში რეგისტრაციის ნომერს. მსგავსი შემთხვევები იყო: დიდუბის #6 , ნაძალადევის #61, #70, #13, მთაწმინდის #4 უბანზე, კრწანისის #19, დიდუბის #35 და #36 უბნებზე.

"ჩვენი დამკვირვებლების მიერ შენიშვნის დაფიქსირების შემდეგ, კონტროლი განხორციელება ცალკეულ შემთხვევებში შეჩერდა", - განაცხადა საიას თავმჯდომარემ, ანა ნაცვლიშვილმა.

მისი თქმით, ნაძალადევის #19 უბანზე პირველი ამომრჩეველი მართვის მოწმობით დაუშვეს უბანზე, გლდანში #113-ე უბანზე (სპეც უბანი) დილით 7 საათზე უბანზე არ უშვებდნენ საიას დამკვირვებელს. ორგანიზაციაში აცხადებენ, რომ მათი დამკვირვებელი არ შეუშვეს ხელვაჩაურში #16-ე უბანზეც, არგუმენტი წილისყრის ჩატარების პროცესი იყო.

საიას მონაცემებით, დაგვიანებით გაიხსნა გორის 90-ე უბანი, ბათუმის 38-ე და ნაძალადევის 49-ე საარჩევნო უბნები. წილისყრის პროცედურები კი ნაძალადევის #მე-14 და მეოთხე უბანზე დაირღვა.

ორგანიზაციამ დარღვევებს შორის დააფიქსირა, რომ მთაწმინდის #19 უბანზე უბანზე გამოცხადდა სამი ადამიანი, რომელიც აპროტესტებდა მათი ოჯახის წევრების გადასატანი ყუთის სიაში ჩაწერა.

დღეს, საქართველოში თვითმმართველობის არჩევნები ტარდება, დღის განმავლობაში მედიაცენტრში რამდენიმე არასამთავრობო ორგანიზაცია პრესკონფერენციას გამართავს.