წინასაარჩევნო მონიტორინგის ანგარიშის მიხედვით, თბილისის მერობის კანდიდატი მმართველი პარტიიდან - ქართული ოცნებიდან, კახა კალაძე ყველაზე მეტად და პოზიტიურად საზოგადოებრივი მაუწყებლის მთავარ საინფორმაციო გამოშვებაში გაშუქდა. მისი გაშუქების მეოთხედი, 493 წამი დადებითი იყო. სატელევიზიო არხებს საქართველოს ჟურნალისტური ეთიკის ქარტია 19 ივნისი - 8 ოქტომბრის განმავლობაში აკვირდებოდა.

საზოგადოებრვმა მაუწყებელმა კვლევის პერიოდში ყველაზე ნაკლები დრო დაუთმო თბილისის მერობის კანდიდატების უარყოფითად გაშუქებას.

ფოტო: ფოტო პრეზენტაციიდან / ჟურნალისტური ეთიკის ქარტია

კახა კალაძე

ქართული ოცნების მერობის კანდიდატი ყველაზე უარყოფითად (825 წმ) ობიექტივის ეთერში გაშუქდა, ყველაზე დადებითად საზოგადოებრივი მაუწყებლის პირველ არხზე (493 წმ). კალაძეს შესახებ პოზიტიური ინფორმაცია ყველზე ნაკლებად (8 წმ) რუსთავი 2-ის ეთერში ისმოდა.

ზალიკო უდუმაშვილი

ერთიანი ნაციონალური მოძრაობის მერობის კანდიდატი ობიექტივმა მხოლოდ უარყოფითად გააშუქა და მას ჯამში 30 წამი დაუთმო, ტელეკომპანია იმედმა პოზიტიურად საერთოდ არ გააშუქა, პირველმა არხმა და რუსთავი 2-მა კი - ნეგატიურად. ყველაზე პოზიტიურად უდუმაშვილი რუსთავი 2-სა (261 წმ) და TV პირველზე (156 წმ) გაშუქდა, პირველ არხზე კი დადებით გაშუქებას 15 წამი დაეთმო.

ალეკო ელისაშვილი

თბილისის მერობის დამოუკიდებელ კანდიდატი ყველაზე ნეგატიურად იმედზე (63 წმ) გაშუქდა, იმავე დროით და ყველაზე პოზიტიურად კი - პირველ არხზე. სხვა არხებზე ელისაშვილი ნეიტრალურად შუქდებოდა.

ელენე ხოშტარია

ევროპული საქართველოს მერობის კანდიდატი ყველაზე დადებითად TV პირველზე (111 წმ), ყველაზე უარყოფითად კი იმედზე (79 წმ) გაშუქდა.

ირმა ინაშვილი

პატრიოტთა ალიანსის მერობის კანდიდატი უარყოფითად ყველაზე მეტად იმედზე (42 წმ) გაშუქდა, პოზიტიურად ნახევარ წუთზე მეტი კი მხოლოდ ობიექტივზე დაეთმო. ამ არხზე ინაშვილის შესახებ პოზიტიური ინფორმაციის მოსმენა 466 წამის განმავლობაში იყო შესაძლებელი, ნეგატიურად კი საერთოდ არ გაშუქდა. მერობის კანდიდატი ნეგატიურად არ გაშუქებულა არც პირველ არხზე და არც TV პირველზე. თუმცა TV პირველს ის არც პოზიტიურად გაუშუქებია.

მედიამონიტორინგი ევროკავშირისა და გაეროს განვითარების პროგრამის მიერ დაფინანსებული პროექტის 2017 წლის ადგილობრივი თვითმმართველობის არჩევნების მედიაში გაშუქების კვლევა ფარგლებში მიმდინარეობდა.