ბრონტეების უკვდავი ნაწარმოებები ეკრანებს უბრუნდება — ემერალდ ფენელის ქარიშხლიანი უღელტეხილის წარმატების შემდეგ, ჰოლივუდში ჯეინ ეარის ხელახლა გაცოცხლება განიზრახეს. შარლოტ ბრონტეს კლასიკად ქცეული რომანის მორიგ ეკრანიზაციაზე ბრიტანული სტუდია Working Title იმუშავებს. სერიალში მთავარ როლს ეიმი ლუ ვუდი შეასრულებს, სცენარისტი კი მირიამ ბატი იქნება, რომელსაც პოპულარულ ამერიკულ სერიალ Succession-ზე უმუშავია.

ეიმი ლუ ვუდმა ვუდმა კი, 32 წლის ინგლისელმა მსახიობმა, სახელი ნეტფლიქსის სერიალ Sex Education-ში მონაწილეობით გაითქვა. მოგვიანებით, იგი ასევე გამოჩნდა HBO-ის გახმაურებულ სერიალში The White Lotus. ამ უკანასკნელში შესრულებული როლისთვის მსახიობი ემიზე და ოქროს გლობუსზეც კი იყო ნომინირებული.

ფოტო: AFP

რაც შეეხება Working Title-ს, ამ საპროდიუსერო კომპანიის ანგარიშზე არაერთი ცნობილი ეკრანიზაციაა, მათ შორის, ბრიჯიტ ჯონსის ფილმები, 2005 წლის სიამაყე და ცრურწმენა კირა ნაითლის მონაწილეობით და ოსტინის კიდევ ერთი კინოადაპტაცია, ემა (2020), ანია ტეილორ-ჯოით მთავარ როლში. სტუდია ამჟამად ასევე მუშაობს გონება და გრძნობის ეკრანიზაციაზე, რომელშიც დეიზი ედგარ-ჯოუნსს ვიხილავთ. ამდენად, შეგვიძლია მშვიდად ვიყოთ, რადგან ყველასთვის საყვარელი ჯეინ ეარი საიმედო ხელშია...

ჯეინ ეარი ყველა დროის ერთ-ერთი ყველაზე ცნობილი ინგლისური რომანია, რომელიც შარლოტ ბრონტემ 1847 წელს გამოსცა კერერ ბელის ფსევდონიმით. რომანმა ლიტერატურული სამყარო შეცვალა: წიგნი, ფაქტობრივად, პირველი პროზაული ნაწარმოებია, სადაც პროტაგონისტის შინაგან მონოლოგს ვხვდებით და პირველ პირში მოთხრობილ პირად განცდებსა და ფიქრებს ვეცნობით. ამასთან, ჯეინ ეარი სოციალური რომანიცაა, რომელმაც, ბევრის მოსაზრებით, დროს გაუსწრო და შეეხო კლასობრივ, რელიგიურ და სექსუალობის საკითხებს.

გასაკვირი არაა, რომ შარლოტ ბრონტეს უკვდავი კლასიკა მრავალგზის ადაპტირებულია: არსებობს მისი კინო, სატელევიზიო, თეატრალური და საოპერო ადაპტაციებიც კი. ჯეინ ეარი დიდ ეკრანზე ბოლოს 2011 წელს გაცოცხლდა — ფილმში მთავარი როლები მაშინ მია ვაშიკოფსკამ და მაიკლ ფასბენდერმა შეასრულეს.

ასევე იხილეთ:

თუ სერიალებს თვალს აქტიურად ადევნებ, არ დაგავიწყდეს, შემოიხედო ჩვენს ჯგუფშიც – ერთი სერიაც და…