სებ-ის ყოფილი ხელმძღვანელი რომან გოცირიძე ოცნების პრემიერის, ირაკლი კობახიძის განცხადებას ეხმაურება იმის შესახებ, რომ დიდი ბრიტანეთის მიერ სანქცირებულ "იმედთან" და "პოსტვ"-სთან თანამშრომლობა უნდა გააგრძელოს ყველა სახელმწიფო და არასახელმწიფო კომპანიამ. მისი თქმით, "იმედს" ხელოვნური სუნთქვით ვერ გადაარჩენ. ვინც მასთან ითანამშრომლებს განწირულია სანქციებისათვის".

"ოცნების მთავრობის მოწოდება, რომ ყველა სახელმწიფო და არასახელმწიფო ორგანიზაციამ უნდა გააგრძელოს "იმედთან" და "პოსტვ"-სთან თანამშრომლობა, სინამდვილეში ნიშნავს სახელმწიფოს ანუ ხალხის ფულით ამ ორი რუსული არხის შენახვას.

მანამდეც არ აკლებდა რეკლამას საბიუჯეტო ორგანიზაციები ამ ტელევიზიას, მაგრამ ეს ფული ხელფასებსაც კი არ ჰყოფნიდა, ძირითადი დაფინანსება ივანიშვილ-რუხაძისგან მოდიოდა. 500 მილიონი ლარი აქვს დავალიანება იმედს ამ პირებთან დაკავშირებული კომპანიების, მათ შორის "ქართუ ბანკის" წინაშე. "იმედის" აქტივები მხოლოდ 25 მილიონი ლარია, ვალდებულებები კი ნახევარი მილიარდი.

"იმედს" ხელოვნური სუნთქვით ვერ გადაარჩენ. ვინც მასთან ითანამშრომლებს განწირულია სანქციებისათვის. გგონიათ ივანიშვილი გაწირავს "ქართუს" ან რუხაძე "ლიბერთის"(სადღაც ხომ უნდა ჰქონდეს ანგარიშები გახსნილი, თუნდაც ლარებში)? ეჭვი მეპარება. ბრიტანულ სანქციებს რომ ევროპული და ამერიკული მოჰყვება, ნურც ამაში შეგეპარებათ ეჭვი. არც ბრიტანულის სჯეროდა ზოგიერთებს, მაგრამ ხომ მოხდა?

რაც მოსახდენია, მოხდება. ეს მერფის დაუწერელი კანონია", — წერს რომან გოცირიძე.

დიდმა ბრიტანეთმა სამთავრობო პროპაგანდისტული "იმედი" და "პოსტვ" გუშინ, 24 თებერვალს დაასანქცირა.