თუ გჯერა, რომ ერთხელ ყარაულის თოფიც კი გაისვრის და ამ პრინციპის კვალდაკვალ საკუთარი ბედ-იღბლის შემოწმებას ცდას არ დააკლებ, შესაძლოა, ისევე გაგიმართლოს, როგორც ამ ერთ ამერიკელ კაცს...

ოჰაიოს შტატში მცხოვრებმა კაცმა სულ ცოტა ხნის წინ ადგილობრივ ლატარიაში ჯეკპოტი მოიგო — მთელი $3,5 მილიონი. ამ ამბავში უჩვეულო არაფერი იქნებოდა, რომ ის ტაქტიკა, რომლითაც მოგებულს ბედმა გაუღიმა: კაცი თურმე 22 წლის განმავლობაში ერთი და იმავე რიცხვებით ავსებდა ლოტოს ბილეთებს. უფრო კონკრეტულად, ყოველ ჯერზე ხაზავდა 6-ს, 8-ს, 16-ს, 20-ს, 26-ს და 45-ს.

თუმცა, როცა პირველად შეავსო ბილეთი და არ გაუმართლა, არ დანებებულა და მომდევნო ორ ათწლეულზე მეტი ხნის განმავლობაში პრინციპულად არ შეცვალა ექვსრიცხვიანი კომბინაცია. მეტიც, მაშინაც კი არ დაკმაყოფილდა, როცა თავისმა რჩეულმა რიცხვებმა პატარ-პატარა თანხა მოაგებინა.

მოგებულის თქმით, იგი ყოველთვე $10-ს ხარჯავდა ბილეთების შეძენაზე და არასდროს უშვებდა შანსს ხელიდან — მაშინაც კი, როცა ქალაქგარეთ იყო, ბილეთს მეგობარი ყიდულობდა.

როგორც ცნობილია, კაცმა ამჯობინა, მოგებული ჯეკპოტი ერთიანად გაეტანა, ამდენად, $1,7 მილიონი, გადასახადების გარეშე კი $1,28 მილიონი ერგო. ცხადია, ახლა სამსახურს თავი დაანება და ოცნებებს გასაქანი მისცა: მაშინვე ცოლს ახარა, რომ სულ მალე დიდი აუზი ექნებოდათ. აუზთან ერთად, "ჯიუტი" იღბლიანი აპირებს, ბინა შეიძინოს და სახლში სავარჯიშო დარბაზი მოაწყოს.