დღეს, 8 თებერვალს, თბილისში, "ექსპო ჯორჯიაში", "თავისუფლების მოედნისა" და "საქართველოს საზოგადოებრივი ასამბლეის" ორგანიზებით, სამოქალაქო ფორუმი "ახალი საზოგადოებრივი შეთანხმება საქართველოს გულისთვის" გაიმართა, რომელმაც სხვადასხვა სფეროს პროფესიონალები, სამოქალაქო ლიდერები და აქტიური მოქალაქეები გააერთიანა.

ფორუმის მონაწილეებმა იმსჯელეს, როგორი საქართველოს აშენებაა ღირსი მომდევნო ორი–სამი ათწლეულის განმავლობაში, რა ბარიერები აფერხებდა ამ ხედვის განხორციელებას დამოუკიდებლობის შემდეგ და რა როლი უნდა ჰქონდეს საქართველოს საერთაშორისო საზოგადოებაში.

ფორუმზე გამოსვლისას "თავისუფლების მოედნის" თავმჯდომარემ ლევან ცუცქირიძემ აღნიშნა, რომ სამოქალაქო წინააღმდეგობა უნდა გადაიზარდოს სანდო ალტერნატივად.

"ჩვენი ბრძოლა არ უნდა შემოიფარგლოს მხოლოდ წინააღმდეგობით, ჩვენ უნდა ვიყოთ მზად გამარჯვებისთვის. სწორედ ამისთვის არის ეს შეკრება", — თქვა ლევან ცუცქირიძემ.

მისი თქმით, რეალური ძალა არ მდგომარეობს შიშსა და იძულებაში, არამედ ადამიანებში, რომლებიც ერთად ფიქრობენ, გეგმავენ და მოქმედებენ.

ფორუმის ფარგლებში სიტყვით გამოვიდნენ: ნინო დობორჯგინიძე, დათია ბადალაშვილი, ლევან ღამბაშიძე, ნინო კასრაძე, თოზუ გულმამედელი და ვაჟა გაფრინდაშვილი. გამომსვლელებმა სხვადასხვა პერსპექტივიდან ისაუბრეს მოქალაქის ღირსებაზე, კულტურულ ლიდერობაზე, სოციალურ უსაფრთხოებაზე, პოლიტიკური ანგარიშვალდებულების მნიშვნელობასა და საზოგადოების ნდობის აღდგენაზე.

ფორუმის ორგანიზატორების განცხადებით, ეს შეხვედრა არ არის ერთჯერადი ღონისძიება და წარმოადგენს გრძელვადიანი სამოქალაქო პროცესის დასაწყისს, რომლის მიზანია საზოგადოების ჩართულობის გაძლიერება, საერთო ხედვის ჩამოყალიბება და პასუხისმგებლიანი პოლიტიკური ლტერნატივის შექმნა.