შფოთვითი აშლილობის მკურნალობა ხშირად მედიკამენტებს, თერაპიას და დიდ ფინანსურ ხარჯებს უკავშირდება. ამ ყველაფერს კი ხშირად ახლავს გვერდითი ეფექტები და დამატებითი სტრესი. თუმცა ახალი კვლევები აჩვენებს, რომ შფოთვის მართვაში შესაძლოა გაცილებით მარტივმა და ხელმისაწვდომმა მეთოდმა ითამაშოს როლი: მუსიკის მოსმენამ.

იანვარში სამეცნიერო ჟურნალ PLOS Mental Health-ში გამოქვეყნებული კლინიკური კვლევის თანახმად, მუსიკის მოსმენა სპეციალურ აუდიოსტიმულაციასთან ერთად შფოთვის სიმპტომების შესამჩნევ შემცირებას იწვევს, განსაკუთრებით მაშინ, როცა სესია დაახლოებით 24 წუთს გრძელდება.

ABS-ის გამოყენებით შექმნილი ტრეკები შეგვიძლია ვიპოვოთ ისეთ პლატფორმებზე, როგორიცაა YouTube და Spotify

ფოტო: Vice

კვლევა ტორონტოსა და დიდი ბრიტანეთის მეცნიერებმა ჩაატარეს და მასში მონაწილეობდა 144 ადამიანი, რომლებიც შფოთვის სამკურნალოდ მინიმუმ ერთ მედიკამენტს იღებენ. მონაწილეები ორ შემთხვევით ჯგუფად გადანაწილდნენ: ერთმა ჯგუფმა ე.წ. "ვარდისფერ ხმაურს" უსმინა, სტაბილურ, ჩანჩქერის მსგავს ხმას, რომელიც საკონტროლო პირობად გამოიყენებოდა; მეორე ჯგუფმა კი მოუსმინა მუსიკას აუდიორიტმული სტიმულაციით (ABS), ტექნიკით, რომლის დროსაც თითოეულ ყურში ოდნავ განსხვავებული ტონი ჟღერს და ტვინში რიტმული პულსის აღქმას ქმნის.

მოსმენის სესიები 12, 24 ან 36 წუთს გრძელდებოდა. შედეგებმა აჩვენა, რომ მათ, ვინც მუსიკას ABS-თან ერთად უსმენდა, შფოთვის დონე მნიშვნელოვნად შეუმცირდათ იმ ადამიანებთან შედარებით, ვინც მხოლოდ "ვარდისფერ ხმაურს" უსმენდა. მიუხედავად იმისა, რომ უფრო ხანგრძლივ სესიებს ზოგ შემთხვევაში უფრო ძლიერი ეფექტიც ჰქონდა, საუკეთესო და ყველაზე სტაბილური შედეგი 24-წუთიანმა მოსმენამ აჩვენა.

მკვლევრების თქმით, რაც უფრო სწორია ხანგრძლივობა, მით უკეთესია შედეგი, ანუ ეფექტი დამოკიდებულია არა მხოლოდ მეთოდზე, არამედ მის ხანგრძლივობაზეც. 24 წუთი აღმოჩნდა ოპტიმალური დრო: საკმარისად გრძელი, რომ შფოთვაზე რეალური გავლენა მოახდინოს, და ამავდროულად იმდენად მოკლე, რომ ყოველდღიურ ცხოვრებაში მარტივად ჩაჯდეს და დამატებით ტვირთად არ იქცეს.

მნიშვნელოვანია აღინიშნოს, რომ მუსიკა შფოთვის სრულ განკურნებას არ წარმოადგენს. კვლევის ავტორები ხაზს უსვამენ, რომ ეფექტი ზომიერია და შედეგების დასაზუსტებლად უფრო ფართომასშტაბიანი კვლევებია საჭირო. თუმცა არსებული მეთოდების ფონზე (მედიკამენტების გვერდითი ეფექტები, თერაპიის სიძვირე, ხელმისაწვდომობის პრობლემები) აუდიოსტიმულაციასთან ერთად მუსიკის მოსმენა, შეიძლება გახდეს იაფი, დაბალი რისკის და ადვილად გამოსაყენებელი დამატებითი საშუალება შფოთვის მართვაში.

შფოთვითი აშლილობის მქონე ადამიანებისთვის, რომლებსაც მუდმივი სტრესისა და შინაგანი "ხმაურის" ჩახშობა სურთ, ეს შესაძლოა არ იყოს სრულყოფილი გამოსავალი, მაგრამ შეიძლება იყოს ერთი პატარა, რეალური შვება. და ზოგჯერ ესეც საკმარისია.

რა არის ABS და როგორ მუშაობს

აუდიორიტმული სტიმულაცია (ABS) არის ბგერაზე დაფუძნებული ტექნიკა, რომლის დროსაც თითოეულ ყურში ოდნავ განსხვავებული სიხშირის ბგერა ჟღერს, შედეგად კი ტვინი აღიქვამს მესამე, რიტმულ ბითს. მკვლევრები სწავლობენ, შეუძლია თუ არა ამ ეფექტს გავლენა მოახდინოს ტვინის იმ ტალღებზე, რომლებიც დაკავშირებულია მოდუნებასთან, ძილთან და შფოთვასთან. ზოგიერთი ადრეული კვლევა მიუთითებს, რომ დაბალი სიხშირის ABS შეიძლება ასოცირებული იყოს შფოთვის შემცირებასა და დამშვიდებასთან, თუმცა ეს მეთოდი არ ანაცვლებს შფოთვის სამედიცინო მკურნალობას და განიხილება მხოლოდ როგორც დამხმარე საშუალება. ეფექტის მისაღწევად აუცილებელია ყურსასმენების გამოყენება, რადგან თითოეულ ყურში განსხვავებული ბგერა უნდა ისმოდეს

სად და როგორ შეიძლება მოვუსმინოთ მუსიკას ABS-თან ერთად

მუსიკის მოსმენა აუდიორიტმული სტიმულაციით დღეს უკვე მარტივად ხელმისაწვდომია და სპეციალურ ტექნიკას არ საჭიროებს. ABS-ის გამოყენებით შექმნილი ტრეკები შეგვიძლია ვიპოვოთ ისეთ პლატფორმებზე, როგორიცაა YouTube და Spotify, ძებნაში საკმარისია ჩავწეროთ "binaural beats", "music with binaural beats" ან "anxiety relief binaural beats". ასევე არსებობს სპეციალური მობილური აპლიკაციები (მაგალითად, Brain.fm, Endel, Meditative Mind და სხვა), რომლებიც მუსიკას აუდიოსტიმულაციასთან აერთიანებს და მოსმენის სესიების ხანგრძლივობასაც გვთავაზობს. საუკეთესო შედეგისთვის რეკომენდებულია მშვიდ გარემოში, ხარისხიანი ყურსასმენებით და დაახლოებით 20–25 წუთის განმავლობაში მოსმენა, თუმცა შედეგები ინდივიდუალურია და შეიძლება ყველასთვის ერთნაირი არ იყოს.

ასევე ნახეთ: