საქართველოს ახალგაზრდა იურისტთა ასოციაციის (საია) ინფორმაციით, "რუსული კანონის" საწინააღმდეგო აქციაში მონაწილეობისთვის დაკავებულ გიორგი ოკმელაშვილის სისხლის სამართლის საქმეზე სამართალწარმოების ყველა ეტაპი დასრულდა. თუმცა, მას ამ დრომდე არ უბრუნებენ კომპანიიდან ამოღებული ნივთების მნიშვნელოვან ნაწილს.

"რუსული კანონის წინააღმდეგ პროტესტის დროს დაკავებული გიორგი ოკმელაშვილის სისხლის სამართლის საქმეზე 2025 წლის 13 ნოემბერს საკასაციო სასამართლოს განაჩენით დასრულდა ადგილობრივ დონეზე სამართალწარმოების ყველა ეტაპი. თუმცა, მას ამ დრომდე არ უბრუნებენ ამოღებული ნივთების მნიშვნელოვან ნაწილს. ბრალდების მხარე ვერ ასაბუთებს, რატომ არის თითქმის ორი წლის განმავლობაში გიორგი ოკმელაშვილის, მისი ოჯახის და მისი კომპანიის ნივთები დაყოვნებული.

საია სასამართლო მონიტორინგს უწევდა გიორგი ოკმელაშვილის მიმართ სისხლის სამართლის საქმეს და ჯერ კიდევ პროცესის მიმდინარეობის ეტაპზე აღნიშნავდა საქმის ხელოვნურად გაჭიანურების თაობაზე და იმას, რომ აღნიშნული საქმე არ არის დაცლილი სავარაუდო პოლიტიკური ნიშნით დევნის მოტივებისგან.

სისხლის სამართლის პროცესებზე დაკვირვების და სამართალწარმოების პროცესში არაერთ შემთხვევაში გამოიკვეთა გამოძიების მიმდინარეობისას ამოღებული ნივთების საგამოძიებო ორგანოს მიერ დაბრუნების ვადებთან დაკავშირებული პრობლემები," — ვკითხულობთ საია-ს განცახდებაში.

შეგახსენებთ, "რუსული კანონის" საწინააღმდეგო აქციაში მონაწილეობისთვის დაკავებულ გიორგი ოკმელაშვილს 5 წლით თავისუფლების აღკვეთა მიესაჯა. სარეკლამო კომპანია "ლიმონის" დამფუძნებელს აქცია შინაგან საქმეთა სამინისტროს თანამშრომლებზე თავდასხმას ედავებოდნენ.