გიორგი ოკმელაშვილს 5 წლით თავისუფლების აღკვეთა მიესაჯა. მას პოლიციელზე თავდასხმას ედავებიან.

სარეკლამო კომპანია "ლიმონის" დამფუძნებელი, გიორგი ოკმელაშვილი 2024 წლის წლის 15 მაისს რუსული კანონის მოწინააღმდეგეთა აქციაზე დააკავეს.

პატიმრობა 2024 წლის მაისში შეუფარდეს. მას 2 მუხლს ედავებოდნენ — ნარკოტიკული საშუალებების შენახვა, რომელიც ადვოკატის მოთხოვნის შემდეგ პროკურორმა მოუხსნა. მეორე ბრალდება იყო პოლიციელზე თავდასხმა.

"საბჭოთა ცირკი" — ასე შეაფასა მოსამართლის განმარტება გიორგი ოკმელაშვილმა.

ადვოკატ კობა ბარამიას განცხადებით, გიორგი ოკმელაშვილი სასამართლოს გამამტყუნებელ განაჩენს გაასაჩივრებს.

"ჩვენ არ გვქონდა არანაირი ობიექტური საფუძველი, რომ გვევარაუდა, რომ სასამართლოს შეიძლებოდა არათუ გაემართლებინა პირი, არამედ უფრო მსუბუქ შემადგენლობაზე გადმოეკვალიფიცირებინა. დღეს სასამართლომ, პრაქტიკულად, თვალი დახუჭა პოლიციელების მიერ გამოძიების ეტაპზე ცრუ ინფორმაციის მიწოდების ფაქტზე და აპელირება გააკეთა იმაზე, თითქოს დაცვის მხარემ ეს მტკიცებულებები არ გამოიკვლია. რა მტკიცებულებებიც გამოვიკვლიეთ, იმ ნაწილშიც სასამართლომ არსებითად ხელი შეგვიშალა. თავიდანვე კლიმატი, დამოკიდებულება გამოჩნდა, მოსამართლემ დაკითხვის დროს ყველა კრიტიკული კითხვა მოგვიხსნა პოლიციელის დაკითხვის დროს, ამიტომ აზრი არ ჰქონდა სხვა პოლიციელების დაკითხვას, ეს ადამიანები არსებითად ეწინააღმდეგებოდნენ ბრალდების მხარის წარმოდგენილ ვიდეოჩანაწერს. ჩვენ საბოლოო ჯამში ის შედეგი მივიღეთ, რასაც ველოდებოდით იმ დღიდან, როცა მოსამართლემ უსაფუძვლოდ გადადო სხდომები და შესაძლებლობა არ მოგვცა საქმეზე დასკვნითი სიტყვებით მიგვემართა. მას წინასწარ ჰქონდა აზრი ჩამოყალიბებული, რომ პირი დამნაშავე იყო.

რა თქმა უნდა, გადაწყვეტილებას გავასაჩივრებთ, ეს ფორმალური ამბავია, მაგრამ გავასაჩივრეთ სააპელაციო სასამართლოში და კონკრეტული პრეტენზიები გვექნება ოკმელაშვილის უფლებების დარღვევის ნაწილში ადამიანის უფლებათა ევროპულ სასამართლოში", — განაცხადა ბარამიამ. მის კომენტარს ინტერპრესნიუსი ავრცელებს.

ცნობისათვის, საქმეზე განაჩენი 15 იანვრის სხდომაზე უნდა გამოცხადებულიყო, მაგრამ მოსამართლემ პროცესი გადადო, რადგან მხარეებს საპროცესო შეთანხმების შესაძლებლობა მისცა, მაგრამ მხარეებს შორის საპროცესო შეთანხმება არ შედგა.