ირანმა რუსეთს ბალისტიკური და საჰაერო დაცვის რაკეტები გადასცა. რაკეტების ღირებულება დაახლოებით $2,7 მლრდ-ია. ამის შესახებ ინფორმაციას უკრაინული მედია Bloomberg-ზე დაყრდნობით ავრცელებს.

2021 წლის ბოლოდან დღემდე ირანის მიერ რუსეთისთვის გადაცემული სამხედრო დახმარების საერთო ღირებულება $4 მლრდ-ს აღემატება.

მოსკოვსა და თეირანს შორის თანამშრომლობა რუსეთის უკრაინაში შეჭრამდე დაიწყო. პირველი რაკეტის მიწოდების ხელშეკრულებები 2021 წლის ოქტომბერში გაფორმდა.

$2,7 მლრდ-ის პაკეტი ასობით Fath-360 მოკლევადიან ბალისტიკურ რაკეტას, თითქმის 500 სხვა მოკლევადიან ბალისტიკურ რაკეტას და დაახლოებით 200 საჰაერო დაცვის რაკეტას მოიცავდა. გარდა ამისა, თეირანმა რუსეთს მილიონობით საბრძოლო ვაზნა და არტილერიის ჭურვი მიაწოდა.

მიუხედავად იმისა, რომ რუსეთმა და ირანმა 2025 წლის იანვარში სტრატეგიული პარტნიორობის შეთანხმება გააფორმეს, დოკუმენტში არ არის ნახსენები ერთმანეთის დაცვის ვალდებულებები. ასევე აღსანიშნავია, რომ ისრაელთან 12-დღიან დაპირისპირებაში მოსკოვმა თეირანს მნიშვნელოვანი დახმარება არ გაუწია.

ცნობისთვივს, ირანში მასობრივი ქუჩის საპროტესტო აქციები 28 დეკემბრიდან მიმდინარეობს. ისინი თეირანის მთავარ ბაზარში დაიწყო, სადაც ჰიპერინფლაციისა და ფასების მკვეთრი რყევებზე პროტესტის ნიშნად ბევრმა მაღაზიის მეპატრონემ თავისი სავაჭრო ობიექტი დახურა.

29 დეკემბერს ირანის ეროვნული ვალუტა, რიალი, ახალ რეკორდულ მინიმუმამდე დაეცა (ერთი რიალი დაახლოებით 0.00002 ევროს ტოლი იყო). მსოფლიო ბანკის მონაცემებით, ოქტომბერში ირანში სურსათის ინფლაციამ 64.2%-ს მიაღწია — ეს მაჩვენებელი ქვეყნის ანტიინფლაციური რეიტინგით მხოლოდ სამხრეთ სუდანს უსწრებს.

აშშ-ში დაფუძნებული ადამიანის უფლებათა დამცველი ორგანიზაცია HRANA-ს მონაცემებით, ირანში მიმდინარე არეულობის დროს 500-ზე მეტი ადამიანი დაიღუპა და 10 600-ზე მეტი დააკავეს.