ევროკავშირის უმაღლესი წარმომადგენელი საგარეო საქმეთა და უსაფრთხოების პოლიტიკის საკითხებში კაია კალასი ირანში მიმდინარე მოვლენებს ეხმაურება. კალასის განცხადებით, დემონსტრანტაციების სასტიკი ჩახშობის საპასუხოდ ევროკავშირი ირანს დამატებით სანქციებს დაუწესებს.

"ევროკავშირს უკვე აქვს ფართომასშტაბიანი სანქციები ირანის მიმართ — მათ შორის ადამიანთა უფლებების დარღვევებზე პასუხისმგებელი პირების, ბირთვული საქმიანობის გავრცელების და თეირანის მიერ რუსეთის ომის მხარდაჭერის გამო უკრაინაში და მზად ვარ, წარვადგინო დამატებითი სანქციები რეჟიმის მიერ მომიტინგეების მიმართ სასტიკი რეპრესიების საპასუხოდ," — განუცხადა კალასმა POLITICO-ს Brussels Playbook-ს.

მანამდე ევროკომისიის პრეზიდენტმა, ურსულა ფონ დერ ლაიენმა განაცხადა, რომ ბრიუსელი ვითარებას "აკვირდება".

"რეპრესიები ძლიერდება და უდანაშაულო ადამიანების სიცოცხლე იკარგება, ამიტომ ჩვენ ყურადღებით ვაკვირდებით სიტუაციას.

ევროპა ირანელი ხალხის გვერდით დგას მათ ლეგიტიმურ ბრძოლაში თავისუფლებისთვის", — დაწერა ფონ დერ ლაიენმა.

ხოლო ევროპარლამენტის პრეზიდენტმა რობერტა მეტსოლამ X-ზე დაწერა, რომ "ევროპამ უნდა გააცნობიეროს თავისი ვალდებულება და მოქმედების აუცილებლობა".

"თავისუფლებისკენ სწრაფვა ყველა ჩვენგანისთვის, როგორც ადამიანებისთვის, თანდაყოლილია. ირანის ახალი თაობა ღირსებასა და თავისუფლებას მოითხოვს. 2026 წელს ეს ძალიან ბევრის მოთხოვნა არ უნდა იყოს. მკვლელობები უნდა შეწყდეს. უდანაშაულოები და დევნილები უნდა გაათავისუფლონ. რეპრესიები უნდა დასრულდეს.

ქუჩაში მყოფ მამაც გოგონებს, სტუდენტებს, მამაკაცებსა და ქალებს: ეს თქვენი დროა. იცოდეთ, რომ ნებისმიერი რეჟიმი, რომელიც კომუნიკაციას ბლოკავს, საკუთარი ხალხის შეშინებული რეჟიმია.

ევროპამ უნდა გააცნობიეროს თავისი მოვალეობა და მოქმედების აუცილებლობა.

ირანი თავისუფალი იქნება", — დაწერა მეცოლამ.

შეგახსენებთ, ირანში დემონსტრაციები 2025 წლის 28 დეკემბერს დაიწყო. იმ დღეს, თეირანში მაღაზიების მეპატრონეებმა ეკონომიკური მდგომარეობის გაუარესების გამო პროტესტის ნიშნად თავიანთი ბიზნესები დახურეს. მოგვიანებით, საპროტესტო აქციებს სხვა მსხვილი ქალაქების მაცხოვრებლებიც შეუერთდნენ.

პროტესტი მოგვიანებით არეულობაში გადაიზარდა. თეირანის მერმა ალირეზა ზაკანიმ განაცხადა, რომ 9 იანვრის ღამეს გამართული პროტესტის დროს 50-ზე მეტი ბანკი და რამდენიმე სამთავრობო შენობა დაიწვა, ხოლო 30-ზე მეტი მეჩეთი განადგურდა.