ირანელ დიპლომატებს თეირანის რეჟიმის მიერ მომიტინგეების სასტიკი ჩახშობის საპასუხოდ ევროპარლამენტში შესვლა აეკრძალებათ. ამის შესახებ ინფორმაციას POLITICO ავრცელებს.

ევროპარლამენტის პრეზიდენტმა რობერტა მეცოლამ ეს გადაწყვეტილება ევროპარლამენტარებისთვის გაგზავნილ წერილში გამოაცხადა. აკრძალვა გავრცელდება პარლამენტის ყველა შენობაზე — ბრიუსელსა და სტრასბურგში, სადაც ძირითადი დებატები იმართება, ასევე ლუქსემბურგში მდებარე სამდივნოზე.

ეს ნიშნავს, რომ ირანის პასპორტის მქონე ყველა პირი შესასვლელთან შემოწმდება და ისინი, ვინც რეჟიმისთვის მუშაობენ, ვერ შეძლებენ შენობაში შესვლას.

"ირანელ ხალხს შეუძლია კვლავ დაეყრდნოს ამ პარლამენტს მხარდაჭერის, სოლიდარობისა და ქმედებების თვალსაზრისით," — დაწერა მეცოლამ წერილში.

აკრძალვა იმ ფონზე გამოცხადდა, როცა საერთაშორისო აღშფოთება იზრდება თეირანის მიერ ბოლო ორი კვირის განმავლობაში ქვეყნის მასშტაბით გამართულ მასობრივ დემონსტრაციებზე ძალადობრივი რეაგირების გამო.

მეცოლამ არ გამორიცხა ევროკავშირის მხრიდან ახალი სანქციების დაწესება და მხარდაჭერა გამოუცხადა დემონსტრანტებს, რომლებიც აიათოლა ალი ხამენეის მმართველობის დასრულებას ითხოვენ. სანქციების საკითხი ამჟამად ოფიციალურად განიხილება ევროკავშირის დიპლომატიურ სამსახურში.

"ვინც ქუჩებში სიცოცხლეს რისკავს და ის პოლიტიკური პატიმრები, რომლებიც კვლავ დაკავებულები არიან, მათ მხოლოდ სოლიდარობა არ ჰყოფნით... მე მივიღე გადაწყვეტილება, ავკრძალო ირანის ისლამური რესპუბლიკის ყველა დიპლომატის, დიპლომატიური მისიების თანამშრომლის, მთავრობის წარმომადგენლისა და ოფიციალური პირის შესვლა ევროპარლამენტის ნებისმიერ შენობაში," — განაცხადა მეცოლამ.

მისი თქმით, ერთ-ერთი იდეა, რომელმაც წარსულში მხარდაჭერა მოიპოვა, არის ისლამური რევოლუციური გვარდიის კორპუსის ტერორისტულ ორგანიზაციად გამოცხადება და "ევროკავშირის სანქციების გაფართოება ყველა იმ პირის მიმართ, ვინც ჩართულია რეპრესიებში, ძალადობასა და სიკვდილით დასჯებში".

"მაშინ, როცა ირანის ქუჩებში პროტესტი შეუჩერებლად გრძელდება, რეჟიმის რეპრესიებიც გრძელდება — იბლოკება კომუნიკაციები, ვრცელდება ცნობები ძალადობის, მკვლელობებისა და თვითნებური დაკავებების შესახებ... ვიცი, რომ ბევრი თქვენგანი ხედავს ირანის მამაც ხალხს, რომელიც ფეხზე დგას. ჩვენ გვესმის მათი — ისინი ღირსებასა და თავისუფლებას ითხოვენ", — აღნიშნა მან.

ცნობისთვივს, ირანში მასობრივი ქუჩის საპროტესტო აქციები 28 დეკემბრიდან მიმდინარეობს. ისინი თეირანის მთავარ ბაზარში დაიწყო, სადაც ჰიპერინფლაციისა და ფასების მკვეთრი რყევებზე პროტესტის ნიშნად ბევრმა მაღაზიის მეპატრონემ თავისი სავაჭრო ობიექტი დახურა.

29 დეკემბერს ირანის ეროვნული ვალუტა, რიალი, ახალ რეკორდულ მინიმუმამდე დაეცა (ერთი რიალი დაახლოებით 0.00002 ევროს ტოლი იყო). მსოფლიო ბანკის მონაცემებით, ოქტომბერში ირანში სურსათის ინფლაციამ 64.2%-ს მიაღწია — ეს მაჩვენებელი ქვეყნის ანტიინფლაციური რეიტინგით მხოლოდ სამხრეთ სუდანს უსწრებს.

აშშ-ში დაფუძნებული ადამიანის უფლებათა დამცველი ორგანიზაცია HRANA-ს მონაცემებით, ირანში მიმდინარე არეულობის დროს 500-ზე მეტი ადამიანი დაიღუპა და 10 600-ზე მეტი დააკავეს.