ირანის უზენაესმა ლიდერმა ალი ხამენეიმ აშშ-ის პრეზიდენტი დონალდ ტრამპი გააფრთხილა, რომ მას დაამხობენ. ამ განცხადებას ხამენეი ქვეყანაში მიმდინარე პროტესტებზე საუბრისას და უცხოეთის მიერ მხარდაჭერილი ძალების დახმარებით ირანის დესტაბილიზაციის მცდელობების ბრალდების ფონზე აკეთებდა. ამის შესახებ ინფორმაციას ირანული მედია ავრცელებს.

"ტრამპმა უნდა იცოდეს, რომ მსოფლიო ტირანები, როგორებიც იყვნენ ფარაონი, ნიმროდი, რეზა შაჰი და მოჰამედ რეზა შაჰი, თავიანთი ქედმაღლობის პიკზე დაამხეს. მასაც დაამხობენ", — განაცხადა ხამენეიმ.

მისი თქმით, ისლამური რესპუბლიკა ამ არეულობის წინაშე უკან არ დაიხევს.

"ყველამ უნდა იცოდეს, რომ ისლამური რესპუბლიკა ასიათასობით ღირსეული ადამიანის სისხლით მოვიდა ხელისუფლებაში და იგი დივერსანტების წინაშე უკან არ დაიხევს," — თქვა მან.

ქვეყანაში მიმდინარე პროტესტებზე საუბრისას ხამენეიმ დემონსტრანტები აშშ-ის პრეზიდენტის გახარების მცდელობაში დაადანაშაულა. "მათ უნდათ, რომ ის გაახარონ. მას რომ ქვეყნის მართვა სცოდნოდა, საკუთარ ქვეყანას მართავდა," — განაცხადა მან და დაამატა, რომ შეერთებულ შტატებში მრავალი შიდა პრობლემა არსებობს.

ხამენეიმ მხარდამჭერებს ერთიანობისკენ მოუწოდა.

"ძვირფასო ახალგაზრდებო, შეინარჩუნეთ მზადყოფნა და ერთიანობა. ერთიანი ერი ნებისმიერ მტერს დაამარცხებს," — განაცხადა მან.

ცნობისთვის, ირანში მასობრივი ქუჩის საპროტესტო აქციები 28 დეკემბრიდან მიმდინარეობს. ისინი თეირანის მთავარ ბაზარში დაიწყო, სადაც ჰიპერინფლაციისა და ფასების მკვეთრი რყევებზე პროტესტის ნიშნად ბევრმა მაღაზიის მეპატრონემ თავისი სავაჭრო ობიექტი დახურა.

29 დეკემბერს ირანის ეროვნული ვალუტა, რიალი, ახალ რეკორდულ მინიმუმამდე დაეცა (ერთი რიალი დაახლოებით 0.00002 ევროს ტოლი იყო). მსოფლიო ბანკის მონაცემებით, ოქტომბერში ირანში სურსათის ინფლაციამ 64.2%-ს მიაღწია — ეს მაჩვენებელი ქვეყნის ანტიინფლაციური რეიტინგით მხოლოდ სამხრეთ სუდანს უსწრებს.