აშშ-ის პრეზიდენტი დონალდ ტრამპი იმ ქვეყნებს, რომლებიც ირანთან ბიზნესს აწარმოებენ, ახალ 25%-იან ტარიფს უწესებს. CNN-ის განმარტებით, ეს განცხადება შეიძლება ნიშნავდეს იმას, რომ ჩინეთიდან შემოტანილი საქონელი აშშ-ში იმპორტისას მნიშვნელოვნად გაძვირდება.

"ძალაშია დაუყოვნებლივ, რომ ნებისმიერი ქვეყანა, რომელიც ბიზნესს აწარმოებს ირანის ისლამურ რესპუბლიკასთან, 25%-იან ტარიფს გადაიხდის ნებისმიერ და ყველა სახის ბიზნესზე, რომელსაც აშშ-სთან აწარმოებს. ეს ბრძანება საბოლოოა", — დაწერა დონალდ ტრამპმა Truth Social-ზე.

თეთრმა სახლმა ტარიფთან დაკავშირებით დამატებითი ინფორმაციის გაზიარებაზე და იმაზე, თუ როგორ აპირებს ტრამპის ადმინისტრაცია მისი განხორციელებას უარი თქვა.

CNN წერს, რომ ტრამპს არ დაუკონკრეტებია, რას გულისხმობს "ირანთან ბიზნესის წარმოება". მათივე ცნობით, ამ განცხადებამ არაერთი კითხვა გააჩინა, მათ შორის — როგორ იმუშავებს ეს დამატებითი ტარიფები, რომელი ქვეყნები აღმოჩნდებიან სამიზნეში და შეეხება თუ არა გაზრდილი გადასახადი როგორც საქონელს, ასევე მომსახურებებსაც.